CECABA All-star nakaipsot sa NBAC Selection

CEBU, Philippines - Gipangulohan ni Chester Cokaliong ang balanseng opensiba dihang ang Cebu Eastern College Alumni Basketball Association (CECABA) All-Stars mipilde sa Newsmen Basketball  Association of  Cebu (NBAC) Tria-Media Selection, 115-101 atol sa exhibition game niadtong Domingo didto sa City Sports  Club-Cebu (CSCC) gym sa Cebu Business Park.

Si  Cokaliong sa Class '78 mipauwan og siyam ka 3-pointers alang sa iyang game-high 31 puntos nga igo na kaayo alang kaniya aron ilhong All-Star MVP award nga maoy iyang ika-15 sukad ang Easternians miapil na og community ug alumni-based leagues niadtong 2002.

Nakakuha sab og suporta gikan nilang Shaun Christopher Wang sa Class '66 ug Mark Eugene Bukiron sa Class '99  nga mitimbre'g 21 ug 20 puntos matag usa, samtang si Joseph James Yu sa  Class '95 mitikdol og 13 puntos alang sa eksplosibong ataki sa CECABA Selection.

Sila si Gabriel Bonjoc ug Calvin Cordova mihimo'g 4-0 run alang sa NBAC, apan didto ra kutob ang ilang maayong labok kay sila si  Cokaliong ug Wang   misugod na'g panginit alang sa CECABA ni coach Jojo  Romarate aron moposte sa labing una nilang double digit nga labaw, 23-12.

Nakan-an sa NBAC All-Star ang labaw ngadto na lang sa otso puntos sa halftime, 57-65 ug gani misikit pa kini, 65-68, apan nausik lang ang ilang mga paningkamot kay si Bukiron miduslit og 12 puntos alang sa makabungog nga 20-4 nga naghatag sa CECABA sa labing daku nilang labaw nga 19 puntos, 69-88 sa third period.

Ang ikasiyam ug katapusang triple ni  Cokaliong maoy nagselyado sa kadaugan sa CECABA, 115-99. Si Johnrey Bayking mipasud sa wala nay bili nga basket alang sa final tally.

Si Philip Cerojano  maoy nangu sa NBAC pinaagi sa iyang 28 puntos, gisundan ni Bayking nga adunay 19 puntos. Sila si Jun  Solon ug Bonjoc nagkumboya'g 35 puntos, samtang si Rodel Quimod miamot og 10 puntos.

PUNTOS MATAG USA

CECABA (115) - Ches. Cokaliong 31, Wang 21, Bukiron 20, JJ Yu 13, Teves 7, R. Yu 6, Babor 5, Chris. Cokaliong 4, Sia 4, Tan 2.

NBAC (101) - Cerojano 28, Bayking 19, Solon 18, Bonjoc 17, Quimod 10, Cordova 4, Suarez 3, Ligan 2.