Ex-world champions sparmate ni Pacquiao

CEBU, Philippines - Duha ka mga former world  champions ang kuhaon nga sparmate alang sa training ni Filipino boxing icon  Manny Pacquiao kinsa makig-rematch ni WBO welterweight champion Timothy Bradley sa Abril 12 didto sa MGM Grand sa Las Vegas.

Duha sa mga gitan-aw nga sparring partners ni Pacquiao mao sila si kanhi IBF lightweight king Steve  Forbes ug ex-WBO light welterweight champion Kendall  Holt. Sila si Holt ug Forbes gipaabot nga mouban sa training unya ni Pacquiao didto sa  General Santos City diin nagpaabot na usab ang laing undefeated light welterweight nga si Lydell Rhodes kinsa una nang gikuha ni Freddie Roach.

Ang suod nga  higala ug assistant trainer ni Pacquiao nga si Buboy Fernandez nagkanayon nga human sa pipila ka semana  nga pakondisyon, andam na si Pacquiao nga sugdan ang iyang sparring sessions. "Ready na si Manny sa sparring, kahit sa Monday magsimula," matud pa ni Fernandez sa Philboxing.com."Kondisyon na kasi nasu-suplementohan yung roadwork ng basketball sa gabi  pagkatapos ng training  sa maghapon."

Si Fernandez usa ang kuyog ni Pacquiao sa training samtang padung pa sa nasud si Roach nga moabot karong  semanaha.

Sila si  Forbes ug Holt  nakita nga makatabang sa preparasyon ni Pacquiao kinsa  tinguha nga mobawos ni  Bradley tungod usab kay mga paspas ug kusgan usab ang duha nga seguradong  musuway sa katakus sa kanhi eight-division world champion.