San Mig mosakmit sa korona, RoS mobangon

CEBU, Philippines - Malangkat na ba kaha sa San Mig Coffee Mixers ang Philippine Cup title, o mobangon pa ang Rain or Shine Elasto Painters?

Kini ang pangutana nga matubag human sa ilang duwa sa Game-5 sa ilang "best-of-seven" final series karong alas-4:30 sa hapon didto sa Smart Araneta Coliseum.

Ang San Mig mipalayo og maayo sa series, 3-1 ug masuwertihan karon hingpit na  nilang maangkon ang titulo.

Ang  multi-titled  PBA  coach nga si Tim Cone sa San Mig,  nga  nagtinguha sa ika-16 niyang PBA title miingon nga dili sila mokompiyansa ug pahugtan pa nila ilang depensa aron dili makabangon ang Painters.

Sa kasaysayan sa PBA, bugtong ang Ginebra pa lang  ang nakarekober gikan sa 1-3 nga biya sa serye ug midaog sa korona batok sa Purefoods  niadtong 2006.

Sa laing bahin, ang team physician sa Mixers nga si Raffy Sanchez mipasalig nga makaduwa karong adlawa si Marc Pingris human matusluki ang mata niini ni Painters center JR Quinahan atol sa usa ka play.

Ang head coach sa Rain or Shine nga si Yeng Guiao namahayag nga dili pa sila mosurender bisan pa sa 1-3 nga pagkalubong. (BANAT NEWS)