Tigers gilubong sa tropang Texters

CEBU, Philippines - Bisan og tagsa lang makadawat og bola ang import sa Talk 'N Text nga si Ritchie Howell, apan wala kini usik  diin  miiskor siya'g 19 puntos  alang sa iyang koponan nga  walay kukaluoy midemolis  sa Tagoloan Tigers, 105-70 sa pagsugod sa  2014 Cebu City Charter Day Cup basketball tournament kagabii didto sa Cebu Coliseum.

Ning pagsuwat, padayon pang nagtakus ang Global Port Batang Pier batok sa Alaska Aces nga gipangulohan sa Sugbuanong tirador nga si Dondon Hontiveros.

Si Niño Canaleta midugang og 15 puntos, lakip ang tulo ka sunod-sunod nga 3-pointers sa third period.  Ang laing Texters nga miiskor og double figures mao silang Ranidel de Ocampo ug Danny Seigle  nga adunay 12 ug 11 puntos matag usa.

Sayo kaayong nakalabaw og daku ang Texters batok sa Tigers ni  coach Van Parmis,  usa ka amateur team gikan sa Misamis Oriental.

Ang MVP sa CESAFI sa  miaging tuig nga si Wowie Escosio maoy nangu sa Tigers sa iyang 16 puntos, gisundan ni Patrick Cabahug nga mikimada og 13 puntos.

Karong adlawa,  ang duwa motapon  ngadto  sa Mandaue City Cultural and Sports    Complex diin ang Global Port makigsangka sa Tigers sa alas-6 sa gabii. Sundan kini sa laing duwa tali sa  Aces ug Tropang Texters.

Dad-on pagbalik ang duwa  sa Cebu  Coliseum inig ka Domingo nga maoy katapusang adlaw sa torneyo diin  magbagat ang Aces batok Tigers, samtang ang Global Port makigtigi batok sa  Talk 'N Text.