Talisaynon karatekas hataga'g pasidungog
CEBU, Philippines - Ang Sangguniang Panlungsod sa dakbayan sa Talisay mopasidungog ngadto sa ilang mga atleta nga mihakot og mga medalya sa Batang Pinoy National Finals niadtong Enero 29 hangtod Pebrero 1, 2014 didto sa Bacolod City, Negros Occidental.
Ang Talisay City midaog og duha ka gold, usa ka silver ug tulo ka bronze medals sa karatedo event sa tinuig nga kompetisyon.
Si Gerarld Augustine Baclaan maoy nangu sa kalampusan sa Talisaynon karatekas nga mikabkab og duha ka bulawan pinaagi sa team kata competition (synchronize) mixed age category uban nilang Felix Calipusan ug Jeremy Nopre ug sa boys kata advance 44 kgs. class.
Gawas sa bulawan, ang 14-anyos nga si Baclaan, usa ka tinun-an sa Don Bosco Technology Center (DBTC) nidaog sab og bronze sa boys kumite 44 kgs. division. Ang laing duha ka bronzes gitunol nilang Calipusan, ang 13-anyos nga tinun-an sa Punta Princesa National High School pinaagi sa boys kata advance ug kumite nga pulos ubos sa 40 kgs. class.
Ang bugtong silver sa Talisay nadaog ni Nopre sa boys kata advance 53 kgs category. Ang 12-anyos nga si Nopre nagtungha sa Virgen de la Escuelas Pias.
Ang Talisaynon-academic athletes ubos sa pagtimon sa ilang head coach ug trainor Rhodee Antoinette Saavedra ug assistant coach Ky-za Ocampo, nihatag og dungog dili lang sa dakbayan sa Talisay kun dili hasta usab sa probinsiya sa Sugbu. (BANAT PALARO)
- Latest
