SHS-ADC nangandam sa palaro

CEBU, Philippines - Human sa ilang dominante nga kadaugan sa Central Visayas Regional Athletic Association (CVIRAA) Meet  2014, ang Sacred Heart School-Ateneo de Cebu (SHS-AdC) Magis  Eagles mosentro  na  sab  sa  ilang atensyon pagdepensa sa    korona nila sa Palarong Pambansa sa Mayo didto sa Laguna.

Ang Magis Eagles nga nirepresentar sa Mandaue City mipukan sa University of the Visayas (UV) Baby Lancers nga midala sa Cebu City Niños, 67-57 sa secondary basketball event sa CVIRAA sa  miaging semana didto sa Cebu Coliseum.

Ang maong kadaugan, nakuha sa SHS-AdC Mandaue ang talagsaong "grandslam championship"  ug pasaporte aron  morepresentar na sab sa Central Visayas sa Palarong Pambansa.

Makahuloganon ang kadaugan sa Ateneans  dihang mihimo sila'g upset nga kadaugan batok sa National Capital Region (NCR) nga gibidahan sa San Sebastian College.

Atubangan sa 5,000 ka fans didto sa Lamberto Macias Sports Centre sa Dumaguete City, ang SHS-AdC mipakita nga adunay abilidad ang Region VII nga harian ang basketbol dihang ilang gipilde ang mas inilog nga NCR.

Ning higayona, ang SHS-AdC ni coach Rommel Rasmo nangandam na alang sa laing dakung misyon ilabi na batok sa NCR ug CALABARZON nga maoy tunok sa ilang back-to-back championship.

"Gusto talaga namin makuha ang Palaro last year and we’re glad we made it," matud pa ni Rasmo. "This time, it will be another tough task defending out title."

"Our training never stops as we are competing in various tournaments like the NBTC (National Basketball Training Center) that will surely help the boys prepare for Palaro," dugang pa niya.

Ang Magis Eagles moduwa nga wala na ang ilang star center nga si Henric Dawn Ochea,  kinsa migradwar na ug anaa na sa kolehiyo. Wala hinuon mabalaka  si  Rasmo niini tungod kay anaa kaniya ang center/forward nga si Zachary Huang.

"We have made adjustments after we lost Ochea and Huang will fill the spot. He will be one of our key players most espcially in defense,"  matud pa ni  Rasmo ngadto sa iyang sinaligan gikan sa Cagayan de Oro City.

Ang 6-foot-2 nga si Huang maoy lig-ong haligi sa Magis Eagles ug kini ang rason nga taas gihapon ang iyang kompiyansa  sa Palaro.

"I am very confident with my team and coach behind me. Together we will work hard to defend our title in Palaro," matud pa sa 16-anyos nga si Huang.