Cebu City Niños pabiling naghari sa CVIRAA

CEBU, Philippines -  Wala gihapoy nakapiog  sa Cebu City Niños  sa paghari sud sa 24 ka tuig sa Central Visayas Regional Athletic Association (CVIRAA) Regional Meet 2014 nga gitapos kagahapon didto sa Cebu Coliseum.

 Pakyas ang Cebu Niños paglangkat og duha ka dagkung sports events, apan nakahimo gihapon sila pag-ugmad sa ilang puntos gikan sa miaging edisyon aron mapanalipdan ang ilang kinatibuk-ang korona.

 Ang Niños miani og 891.25 points,  labaw og 19.21 puntos nga ilang nahipos sa miaging edisyon sa tinuig nga kompetisyon nga maoy   moila sa morepresentar sa rehiyon alang sa Palarong Pambansa nga gikatakda karong Mayo didto sa Laguna.

 Ang Cebu Province maoy mipahiluna sa ikaduha nga mipupo'g 522.75 points, gisundan sa  Mandaue City  nga adunay 339.25 points.

 Mohitsas sa top 19 winners mao ang Bohol (214.25 pts.), Lapu-Lapu (129.17 pts.), Talisay (126 pts.), Danao (116.25 pts.), Dumaguete (102.5 pts.), Negros Oriental (101.5 pts.), Tagbilaran (93.92 pts.), Carcar (31.5 pts.), Toledo (22.42 pts.), Guihulngan (21 pts.), Naga (19.25 pts.), Siquijor (16 pts.), Bayawan ug Tanjay (16.5 pts), Bais (11.75 pts), ug Bogo (1.25 pts.).

 Sa elementary level, ang top three mao ang Cebu City nga mikutlo og 379.5 points, gisundan sa Cebu Province nga adunay 271.25 points ug Mandaue City sa ilang  150.5 points.  Mao sab sa secondary division diin ang Cebu Niños  maoy nag-una nga adunay 511.75 points, gisundan sa Cebu Province sa ilang 251.5 points ug Mandaue City nga mikulit  og 188.75 points. (BANAT PALARO)