CEBU, Philippines - Mas kusgan ug hait nga Genesis 'Azukal' Servania (23-0, 9KOs) ang moharong ni kanhi Venezuelan world champion Alexander
'El Explosivo' Muñoz (36-5, 28KOs) sa main event sa "Pinoy Pride XXIV: The Future is Now" sa Marso 1 didto sa Solaire Resort and
Casino sa Parañaque City.
Human sa iyang usa ka buwan nga training camp didto sa Estados Unidos ug Mehiko, ang 22-anyos nga si Servania sa ALA
Boxing Gym misaad og impresibong kadaugan sa iyang pagdepensa sa iyang WBO Intercontinental junior featherweight belt batok sa
delikadong si Muñoz.
"Kompiyansa kaayo ko ron human sa akong training didto sa US ug Mexico. Naka-spar ko og mga world class champions ug
daku ni'g natabang nako," matud pa ni Servania atol sa press conference kagahapon didto sa Copenhagen Hotel and Residences sa
Mandaue City.
"Di lang kusog ug kapaspas, daku pud nahatag nako ang training didto sa akong mental toughness ug experience," dugang pa
niya.
Sa iyang bahin, si ALA Promotions President ug CEO Michael Aldeguer miangkon nga usa ka dakung risgo ang ilang
pagparang ni Servania ngadto ni Munoz, apan angay kining buhaton aron makita kun aduna bay ikabuga ang ilang batos nga mahimong
world title contender.
Sa supporting bout sa maong fight card nga gipasiugdahan sa ALA Promotions ug ABS-CBN Sports, ang laing undefeated
ALA boxer nga si 'King Arthur Villanueva (23-0, 13KOs) manalipod sab sa iyang WBO international junior bantamweight title batok ni
Mexican Juan 'Churritos' Hernandez (23-3, 16KOs), samtang ang super bantamweight prospect nga si 'Prince' Albert Pagara (18-0, 12KOs)
makigbinukbukay ni Isack Junior (22-4, 8KOs) sa Indonesia. (BANAT NEWS)