Roque hari sa 2nd VMA-Power chessfest

 CEBU, Philippines - Gidominar ni Merben Roque ang 2nd VMA-Power Open Chess Tournament sa miaging adlaw didto sa Colonnade Mall.

 Nagkinahanglan lang si Roque nga makakuha og "draw" batok ni NM Rogelio Enriquez sa final round aron maangkon ang titulo ug P6,000 championship purse.

 Ang kanhi Shell Active Chess National Youth champion, mitapos sa 9-round Swiss system competition sa iyang 8.5 points.

 Si Enriquez nga nakakuha'g 7.5 puntos mibulsa og P4,000. Sila si Edsel Montoya, Richard Natividad, Bonn Tibod, Rommel Ganzon, Bryle Arellano ug Venancio Loyola nagsawo sa ikatulong dapit nga parehong adunay 7.0 puntos, apan si Montoya maoy miangkon sa ikatulo pinaagi  sa tie-break output gamit ang Bucholz system.

 Ang kanhi Palarong Pambansa champion nga si FIDE Master Anthony Makinano ug Venerando Malinao maoy mikompleto sa top 10 placers sa ilang 6.5 points matag usa.

 Misulod sa top 20 sa ilang 6.0 puntos matag usa mao sila si Felix Shaun Balbona, Allan Salientes, Carlos Moreno  III, Ronald Ganzon, Yves Fiel, Jethro Esplanada, Ramil Wadim, Vincent Balena, Diego Claro ug Omar Buenaventura.

 Ang top 30 placers sa torneyo mao sila si Khalid Ontawor, Kyle Sevillano, William Retanal, Jr., Andrew Balbona, Erwin Ababat, Eden Diano, Ceferino Vizco, Jr., Spencer de Guzman, Jimmy Ty, Jr., Hector Villamora ug Romulo Piala.

 Sa laing bahin,  sila si Kyle Sevillano ug Andrew Balbona maoy  naghari sa kiddies division sa ilang 6.0 puntos. Sila si Jimmy Ty ug Romulo Pialan maoy best performers sa mga Cepcans sa ilang 5.5 puntos. Si Shaira Mansalud maoy female chess player nga adunay 5.0 puntos.

 Ang duha ka adlaw'ng torneyo nga gipasiugdahan sa Professionals Chess Association (CEPCA) ubos sa liderato ni Engr. Jerry Maratas, gisalmotan sa  130 ka mga partisipante.