NBA All-Star Game karong weekend

Karong weekend na ang ika-63 nga NBA All Star. Ang 2014 EAST Vs. WEST NBA All-Star Game unya pa sa Lunes dinhi sa Pilipinas apan ang ilang mga kalihokan sa All-Star Weekend sugdan karong Sabado apan didto sa America, matumong ang maong kalihokan sa Valentines' Day.

Mao kini ang unang All-Star Game nga dili na si David Stern maoy NBA Commissioner tungod kay human sa 30 ka tuig niyang serbisyo, gipulihan na siya kaniadtong Pebrero 1 sa dugay na sab kaayo niyang assistant nga si Adam Silver.

Ang unang pagahimuon karong Sabado mao ang BBVA Rising Star Challenge ug sa Domingo mao ang 2014 Foot Locker 3-point shootout ug Slam Dunk contest ug sa Lunes mao na ang East vs. West All-Star Game diin pangulohan nilang LeBron James ug Kevin Durant ang tagsa-tagsa nila ka team.

Ang NBA All-Star Game adto ipahigayon sa New Orleans Arena sa Louisiana diin usa sa ilang hometown hero nga si Anthony Davis, palaran kaayong napiling starter ug maoy mipuli sa piangon nga si Kobe Bryant sa Los Angeles Lakers.

Ang 20 anyos nga si Davis moduwa ubos sa Team Webber sa BBVA Rising Stars Challenge.Siya maoy ika-napulo nga players sa 26 ka tuig nga franchise sa Hornets/Pelicans nga nakaduwa sa All-Star ug maoy una gikan niadtong 2011 sukad mapili si Chris Paul.

Mao kini ang labing unang All-Star appearance ni Davis kinsa usa ka produkto sa University of Kentucky Wildcats nga maoy napiling no. 1 NBA draftee kaniadtong 2012.

Si Davis usa lang sa upat ka players nga nag-average ug 20 puntos ug 10 ka rebounds per game ug pulos sila gikan sa teams sa Western Conference kauban silang Western All-Stars Kevin Love ug LaMarcus Aldridge ug ang wala mapili nga si DeMarcus Cousins kinsa misaway sa maong All-Star nga dunay sagol politika.

Sa botasyon sa mga NBA fans, ikapito lang si Davis ug ang mga coaches wala mopili kaniya aron siya malakip sa West line-up. Karon, angay magpasalamat si  Davis ngadto kang Silver ug kang Rod Thorn, ang head sa basketball operations, sa pag-endosar kaniya isip puli kang Bryant kinsa gibotaran nga starter sa West bisan pa sa iyang hangyo ngadto sa mga fans nga dili lang siya pilion.

Hinoon, ang mas daku'g papel sa maong desisyon mao ang Western Conference coach nga si Scott Brooks sa Oklahoma City Thunder.

GRAHAM BATOK PEPING. Gipikhan ni Basketball Association of the Philippines (BAP) Secretary-General Graham C. Lim si Philippine Olympic committee (POC) Chairman Jose (Peping) Cojuangco tungod sa kanunay niining paglikay nga hisgotan ang tinuoray nga kahimtang sa estado sa sports o paugnat sa kusog dinhi sa Pilipinas ubos sa iyang pagdumala.

Gipahungaw ni Lim ang iyang kahimangud pinaagi sa pagpadala og suwat ngadto sa ABS-CBN nga gipetsahan ug Pebrero 8, 2014.

Matud pa ni Lim nga nakuratan siya'g maayo sa mga pasangil ni Cojaungco kalabot sa ilang pagdumala sa BAP apan diay mismo ang nauwahi dili magtinarung og tubag sa mga pangutana ni  BAP president Senador Antonio Trillanes dihang gitulisok siya sa senador nga wala gyu'y nahimo aron molambo ang sports dinhi sa Pilipinas.

Ginganlan ni Lim si Cojuangco nga usa ka diktador nga midawat sa posisyon isip sports leader sa atong nasud. Matud pa ni Lim nga kung may kaisog pa unta si Cojuangco, motambong unya siya sa gihimong Senate Committee hearing sa sports ubos ni Chairman Senator Sonny Angara aron iyang matubag og maayo ang mga isyu.

Apan matud pa ni Lim, mitago si Cojuangco ilawom sa karsones sa iyang pag-umangkon ug padayong milabay og makahilong personal attacks batok kaniya nga wala gyu'y kahigayonan sa pagbawos ug wala'y labot kung unsa may panahom nga giluwatan ni Senador Trillanes kalabot sa iyang nakita sa sports dinhe sa Pilipinas.

MISCELLANEOUS. Welcome back to Cebu Lorenzo "Chao" Sy of La Fortuna Bakery and Hotel Fortuna. Now, the creation of the Cebu-D League is closely becoming a reality. It's just a matter of time and patience and Cebu can have another amateur league the Cebuanos can call their own.