Team Rama 5-0 na sa Inter-Dept.

CEBU, Philippines - Gihari-an na sab og maayo si Mayor Michael Rama ug sa miaging weekend bisan ug uwahi siyang mi-abot alang sa ilang duwa, mi-antug na sab siya'g 37 puntos aron pangulohan ang Mayor's Office (Team Rama) ngadto sa 75 puntos nga demolisyon batok sa City Treasurer's Office (CTO) pinaagi sa pagkulit og 142-67 kadaugan atol sa nagpadayong Cebu City Hall Inter-Department basketball tournament didto sa San Nicolas gym.

Si Mayor Rama kinsa igo lang miduwa sa second ug third quarter, mihimo'g siyam ka three-pointers aron pangulohan ang opensa sa Team Rama kinsa miharus sa elimination round sa ilang 5-0 nga baraha.

Wala na motiwas si Mayor Rama sa fourth quarter tungod sa kadaghan sa iyang mga kalihokan isip amahan sa dakbayan sa Sugbo.

Gawas sa iyang pag-pangigo og maayo, nakakuha sab og suporta si Mayor Rama gikan ni Jun Borres kinsa mihakot og 24 puntos, kanhi CIT Wildcat Emilio Aniñon kinsa midugang og 20 puntos ug kanilang ex-UV Lancer ug Andre Otarra kinsa parehong midugang og 12 puntos matag usa.

 Mi-amot sab og double figures ang ex-USJR Jaguar nga si Argiel Magan ug kanhi SIT Skyblazer nga si Jun Babatid kinsa pareho sab miabuno og 10 puntos matag usa alang sa usa ka scoring package sa Team Rama kinsa segurado nang abante sa semifinals isip top seed. 

 Ang coach sa Team Rama nga si Charlie Reyes malaumon nga makakuha sab sila'g daghang daog atol sa semifinal round sa sunod semana.

Ang CTO  may 12 ka players nga naka-iskor apan usa lang kanila ang nakahimo'g double figures.

Puntos matag usa: 

 Team Rama (142)— M. Rama 37, Borres 24, Aniñon 20, Otarra 12, Toring 12, Babatid 10, Magan 10, Vidal 6, Baculio 6.

CTO (67)— Villaganas 10, Prince 9,Navia 9, Butas 9, Man-on 8, Mondero 6, Ylaya 4, Noel 4, D. Taran 2, Monroid 2, Taran 2. (BANAT NEWS)