Guiao suspenso, multa'g P100,000

CEBU, Philippines - Bug-at  nga  silot  ang gipahamtang sa  PBA ngadto kang Rain or Shine Elasto Painters coach Yeng Guiao tungod sa  gipakita niyang taras, dili lang kausa kun dili  sa makaduha na ka higayon.

 Si Guiao gisuspenso og usa ka duwa pakapin ang multa nga P100,000 tungod sa salawayon niining gipakita atol sa Games-3 ug 4 sa Philippine Cup  "best-of-seven" semifinals series batok sa Petron Blaze Boosters.

 Si Guiao gi-eject sa playing court sa Game-3 human sa sunod-sunod nga technical fouls lakip na ang iyang "dirty finger" ngadto ni Petron forward Arwind Santos.

 Subling gipagawas sa korte si Guiao sa Game-4  tungod  sa pagpunay niya'g reklamo ug pagluwat og ngil-ad nga pulong batok sa mga reperi atol sa maong duwa.

 "Following this morning's meeting with coach Yeng Guiao re: his use of a dirty finger pointed toward the Commissioner's and Tech Committee table, this Office hereby metes out on Coach Guiao the penalty of one (1) game suspension and a fine of P100,000   for persistent conduct unbecoming of a coach," matud pa ni PBA Commissioner Chito Salud.

 Si Guiao dili makatimon sa  Rain or Shine sa Game-5 ugma ug gipaabot nga magkamuritsing kini batok sa Petron.

 Ang Rain or Shine nga naglabaw sa serye, 3-1, nagkinahanglan na lang og usa ka daog  aron makakuha'g pasaporte alang  sa finals sa labing unang higayon.

 Wala hinuon matarog si Guiao sa maong silot  ug matud pa niya  nga dili siya kun dili ang mga reperi ang problema sa liga.

 Dugang pa ni Guiao, nga  gihimo sa PBA pagsuspenso kaniya, tabla ra nga gihatag sa PBA ang Game-5 ngadto sa Petron, kinsa iyang gituohan nga matud pa mas gipaboran sa mga reperi sa ilang serye. (BANAT NEWS)