Tulo ka PBA teams moduwa na sab dinhi sa Sugbu

CEBU, Philippines - Tulo ka PBA teams ang moduwa pag-usab dinhi sa Sugbu   sa ipahigayong 2014 Charter Day Cup sa Pebrero 21-23 sa duha ka managlahing binyu.

 Ang mga duwa sa Pebrero 21 ug 23 anha himuon sa Cebu Coliseum, ang Pebrero 22 adto sa Mandaue City Cultural and Sports Complex.

 Ang  Alaska  Aces, GlobalPort Batang Pier ug wala pa nganli usa ka  PBA team moduwa batok sa Tagoloan Natumolan Tigers, ang bugtong amateur squad nga mosuway sa katakus sa mga PBA teams ning tulo ka adlaw nga torneyo.

 Ang Charter Day Cup magsilbeng tune-up tournament alang sa PBA teams  pangandam sa pagbukas sa PBA Commissioner's Cup sa Marso 7.

 Ang  Alaska  usa  sa  labing sikat nga PBA teams dinhi sa Sugbu tungod sa presensiya nilang Dondon Hontiveros ug Aldrich Ramos nga pulos Sugbuanon.

 Uban nila nga moduwa mao sila si Calvin Abueva, Cyrus Baguio, JV Casino ug Sonny Thoss. Laing Aces cager nga mobida mao sila si Nic Belasco, center Samigue Eman, Leo Avenido ug rookies Ryan Buenafe ug Chris Exciminiano.

 Sa ilang bahin ang GlobalPort ubos sa bag-o nilang coach Pido Jarencio moparada sa ilang mga sinaligan nga sila si Jay Washington, Sol Mercado, Erik Menk, Justin Chua ug Nic Salva.  Abagan sila nilang RR Garcia, Kelly Nabong, Enrico Villanueva, Rudy Lingganay, Marvin Hayes ug Jewel Ponferada.

 Ang upat ka koponan magsangka sa usa ka single round robin format diin ang koponan nga adunay labing nindot nga rekord maoy ilhong kampiyon.

 Ang mga tiket nagkantidad og P50 sa general admission, P150 sa upper box, P300 sa lower box, P400 sa stage seats ug P500 sa ringside.  Alang sa reservations ug dugang impormasyon, mahimong motawag sa numero 0922-2801830, 0943-2978831, 0917-5273888 o 2551405 ug 4029419. (BANAT NEWS)