Mr. Barangay

CEBU, Philippines - Grabeha gyud aning TEAM Mandaue uy ubos sa pagdumala ni Edwin Ermac mura mag double standard ang pagpatuman kunohay sa balaud sa trapiko. Tiaw mo bay hangtod karon wala pa gihapoy gibutang nga jeepney stop o loading/unloading sa Plaridel Street mga usa ka kilometro ang gilay-on bisa’g miingon na si Atty. James Abadia nga kinahanglan gyud ning butangan. Naa baya na sa balaud sa trapiko nga kinahanglan naay jeepney stop o loading/unloading area matag pipila ka metros para dili maglisod ang mga tawo pero kini si Ermac wala gyud magtan-aw aning problemaha kay kuno mas nakapahapsay sa trapiko ang iyang gihimo. Granting nga nakahapsay sa trapiko ang iyang gihimo pero ang mga tawo nag-antos. Daghan na ang nagbagulbol nga mga tawo sa Cambaro, Looc, Alang-Alang ug ang mga pasahero padung sa Lapu-Lapu ug sa norte sa paaging gipatuman sa TEAM Mandaue. Angayan tingaling mangusog si Mayor Jonas Cortes pagbadlong aning kalaki ni Ermac uy kay basin mao ni makaguba sa unsa may political ambition sa mayor o sa iyang mga kaalyado ug kabanay unya sa 2016 kay daghan na ang naglagot aning kalaki ni Ermac, basin maamong hinuon tungod lang aning usa ka tawo. Nganong nakaingon ko double standard ning gihimo sa TEAM Mandaue kay nangusog sila sa no stopping sa Plaridel Street pero kining double parking both sides sa F.C Cabahug Street sa barangay Guizo labi na habig sa GROSMAR padung na sa F.C Rosal wala gyud atimana bisa’g dugay na kining gireklamo sa ubang motorista kay maglisod na sila’g agi. Matud pa sa akong reklamante nga duha na ka tuig ning problemaha pero hangtod karon way gihimo ang grupo ni Ermac. Kun tinuod mong mopatuman sa balaud ayaw pagpamili mga Sirs!

BRGY MAGUIKAY, MANDAUE CITY

“Sir palihog ko’g pasusi anang mga traffic enforcer ilawom sa Maguikay flyover kay naa na sila’y mga katingalahan nga gihimo sa mga driver diri sa lugar labi na sa mga traysikol drivers.”

BRGY CAMBARO, MANDAUE CITY

“Ako sir Jun kay Senior Citizen na ko dili gyod maluoy pagpakanaog nako ang driver kay hadlok silang dakpon sa mga sakop sa TEAM kay gidili man ang pagpahunong sa mga sakyanan gikan sa Compre hangtod na sa may Tita Guwapa sa eskina Opao.”

BRGY CAMBARO, MANDAUE CITY

“Unsa man nang TEAM Sir uy wala may kaluoy kay nagsakay mi’g taxi para diha sa may Bebongs dili man hinuon mi pakanaugon kay no stopping daw, sakay man gani mi’g taxi para naa gyud mi sa tungod manaog miabot na hinuon mi sa may A.C. Cortes unya naglakaw na lang mi.

BRGY CENTRO MANDAUE CITY

“Nganong wala man gyod kasulbad ang TEAM sa problema sa trapiko diha sa may bag-ong merkado hasta diha sa may sports complex dugay na man unta ning problemaha pero wala man sila kasulbad.”

BRGY CENTRO, MANDAUE CITY

“Sir subra gyud kaayo na ka-estrikto si Ermac sa TEAM kay naay sakyanan nga nakababag gamay sa agianan sa ilang balay wala gyud pasayloa mipatawag gyud towing, luoy tawon kaayo ang driver sa sakyanan.”

BRGY BAKILID, MANDAUE CITY

“Naunsa man na si Ermac sir Jun dili man maminaw og katarungan namong mga traffic enforcer dayon mag pangasaba unya dili sad maminaw og suggestion gikan sa iyang mga tawo kay gusto gyod nga iyang tingog ang masunod.”

Alang sa inyong mga reklamo txt lang sa 09071678643 / 09163869202