Petron nakabawos, Rain or Shine gilubong

CEBU, Philippines - Buhi pa ang  Petron Blaze Boosters human makabawos ngadto sa Rain or Shine  Elasto Painters pinaagi sa paglubong, 106-73 sa Game-3 sa "best-of-seven" semifinals series sa PBA Philippine Cup kagahapon didto sa SM Mall of Asia Arena.

 Sa maong kadaugan napakgang sa Petron ang gitinguhang 3-0  lead sa Rain or Shine ug ang 10 winning streak niini gikan sa elimination ngadto sa quarterfinals.

 Human sa duha ka sunod-sunod nilang kadaugan batok sa Painters, ang mga batos ni coach Gee Abanilla mipakita dayon og kaagresibo sa sayong bahin sa duwa aron moposte'g   30-12 nga labaw sa first period.

 Ang reigning PBA MVP nga si Arwind Santos mipabuto og 22 puntos ug milangkat og 18 ka rebounds. Si Santos mao usab ang hinungdan nga napalagpot si Rain or Shine coach Yeng Guiao, kinsa nakit-an nga mihimo'g "dirty finger" ngadto sa Petron star.

 Ang Petron mosuway pagtabla sa serye, 2-2 sa Game-4 ugma  sa gabii didto sa Smart Araneta Coliseum.

 Laing nakaiskor og daku  alang sa Petron mao si Alex Cabagnot, kinsa mihakot og 15 puntos, samtang ang Sugbuanong sentro nga si   Junemar Fajardo mihabwa'g 14 puntos.

 Sila si Beau Belga ug Cebuano bigman JR Quinahan maoy nangulo sa  Rain or Shine nga nagkumboya og 24 puntos. (BANAT NEWS)