Pacquiao, Bradley mag-rematch
CEBU, Philippines - Hingpit nang naplantsa ang negosasyon alang sa gipaabot nga rematch tali ni Filipino boxing superstar Manny ‘Pacman’ Pacquiao ug WBO welterweight champion Timothy ‘Dessert Storm’ Bradley sa Abril 12 didto sa MGM Grand Arena sa Las Vegas.
Si Top Rank Inc. CEO Bob Arum pormal nga mi-anunsiyo sa ikaduhang panagharung nila ni Pacquiao ug Bradley human usab nakapirma ang duha ka boxing star sa tagsa-tagsa nila ka mga fight contract.
"I finished the deal with Pacquiao last week and Top Rank president Todd duBoef finished with Bradley Saturday," matud pa ni Arum sa ESPN.com.
Sa una nilang panagsangka, si Pacquiao nahubuan sa iyang WBO welterweight title human siya gipilde pinaagi sa usa ka sikit ug kontrobersyal nga split decision ni Bradley niadtong Hunyo, 2012 didto sa Las Vegas.
Ning higayuna si Pacquiao makabaton og kahigayunan nga makabawus ni Bradley, samtang ang American boxer musuway pagpamatuod nga siya gyud ang mas kusgan nga boksidor nilang duha.
Ang kanhi eight-division world champion nga si Pacquiao (55-5-2, 38KOs) midaog sa iyang ‘comeback’ fight niadtong Nobiyembre batok ni Mexican American Brandon Rios pinaagi sa usa ka dominante nga unanimous decision didto sa Macau.
Samtang si Bradley (31-0, 12KOs) mibiktima usab sa laing boxing legend ug katapusang nakapilde ni Pacquiao nga si Mexican legend Juan Manuel Marquez sa miaging tuig. (BANAT SPORTS)
- Latest
