4 ka Europeans mokuha'g eskrima exams karon

CEBU, Philippines -  Upat ka Europeans ang mokuha'g Blackbelt Test karong adlawa didto sa Doce Pares World Headquarters sa Sto. Niño Village sa Brgy. Banilad, ning siyudad.

 Ang  eskrima 5th Grade Blackbelt nga si Ermar Alexander sa England maoy mangu sa grupo nga mokuha'g pasulit. Si Alexander nga may dugong Sugbuanon apan didto magtubo sa England, gitakdang mokuha'g pasulit sa 6th Grade Blackbelt sa Doce Pares multi-style system.

 Ang Supreme Grandmaster nga si Dionisio Cañete, ODL (Order of Datu Lapu-Lapu)  mopatuman og bag-ong proseso  sa eksaminasyon alang sa Higher Dan Blackbelts.

 Sa laing bahin, si Diana Fauner nga gikan usab sa England, naglaum nga makatikang gikan sa 1st grade ngadto sa 3rd grade blackbelt.

 Ang taga-Davao nga si Fauner, wala makakuha'g pasulit sa miaging tuig ug karon igmat na siyang makabaton og duha ka blackbelt grades sa usa ka eksaminasyon nga naglakip sa written ug practical tests. Gitakda sab nga mokuha'g Academy of Eskrima Basic Course Final Examinations silang Ronald Froehle sa Austria ug Eric Grosjean sa Sweden. (BANAT NEWS)