Fuentes pakyas
CEBU, Philippines - Nahanaw ang damgo ni Rocky 'Road Warrior' Fuentes sa ALA Boxing Gym pagsakmit sa bakanteng IBF flyweight title human siya gipilde pinaagi sa 12-round unanimous decision sa hometown fighter nga si Amnat Ruenroeng kagahapon didto sa Liptapanlop Hall sa Nakhon Ratchasima, Thailand.
Sa report sa fightnews.com, si Fuentes isog ug agresibo nga miaway ni Ruenroeng, apan wala mosalir ang iyang kabagsik batok sa Thai boxer, kinsa migamit sa iyang footwork aron maangkon ang tam-is nga kadaugan.
Tungod kay usa ka knockout artist ang iyang kontra, si Ruenroeng wala mosakay og sinukliay'g kumo ni Fuentes.
Ang Thai boxer nagtuyok-tuyok sulod sa ring nga maoy nakahatag og problema ni Fuentes nga makapasud sa iyang mga kinumo.
Human sa 12 ka hugna nga away, tulo ka mga hurado ang mihatag og 117-111, 116-112 ug 116-112, pabor ngadto ni Ruenroeng.
"Tibuok ring iya (Ruenroeng) gyud nga gituyok. Sige siya'g dagan hadlok siya makig-'bell-to-bell' ni Rocky," matud pa ni ALA trainer Edmund Villamor.
"Wala gyu'y bisa'g gamay'ng bun-og si Rocky. Gusto mi og "rematch" pero di na mi gusto sa Thailand," dugang pa ni Villamor.
Sakit kaayo ang maong kapildihan ni Fuentes, kinsa dugay nang gapaabot nga makaaway sa world title.
Kun nidaog pa si Fuentes, siya unta ang ikatulong world champion gikan sa ALA Boxing Gym sunod nila ni WBO light flyweight champion Donnie Nietes ug WBO minimumweight titlist Merlito Sabillo.
Si Ruenroeng mipalambo sa iyang rekord ngadto sa 12-0, 5KOs, samtang si Fuentes nakahiagum sa labing una niyang pilde sukad niadtong tuig 2007. Aduna karon siya'y 35-7, 20KOs record. (BANAT NEWS)
- Latest
