Dalaguete mo-host triathlon event

CEBU, Philippines - Masukod na sab ang katakus sa mga Sugbuanong triathletes sa first leg sa Tri Team Triathlon series sa Pebrero 8 didto sa lungsod sa Dalaguete sa habagatang bahin sa Sugbu.

 Sa miaging tuig, ang Dalaguete mao sab ang mi-host sa second leg ug bisan pa sa hamubo nga pahibalo sa edisyon karong tuiga, si Dalaguete Mayor Ronald Cesante miuyon  nga mopahigayon sa kick-off leg.

 Kini ang ikatulong higayon nga ang Dalaguete mi-host og triathlon competition.

 Ang triathlon series usa ka four-leg event nga giorganisar sa Sugbutriathlon uban sa  suporta sa lokal nga kagamhanan sa Dalaguete.

 "We planned to stage the first leg in San Remegio same as last year, but because of the calamity, we decided to moved it to Dalaguete," matud pa ni coach Benjoe Gimenez, usa sa mga organizers.

 Gawas sa team competition, laing kategoriya nga tigian mao ang individual ug kiddie triathlon divisions.

 Ang registration fee nagkantidad og P2,000 alang sa team competition ug individual race, samtang ang mga partisipante alang sa kiddie class nagkantidad  og P1,500. Kadtong moparehistro lapas sa Enero 27 modugang og P500. Ang deadline sa registration gitakda sa Pebrero 3.

 Ang entry forms makuha sa Rudy Project sa Ayala Center-Cebu. Alang sa online registration, mahimong mobisita sa sugbutriathlon.com.