M. Lhuillier Sinulog dartfest moulbo na
CEBU, Philippines - Ang tinuig nga M. Lhuillier Sinulog Darts Tournament moulbo na karong gabii diha sa Baseline Sports and Recreation Center.
Mokabat sa P45,000 nga ganting salapi ang gitagana alang sa mga mananaog ning tuiga.
Ang mga kategoriya nga tigian sa duha ka adlaw nga kompetisyon nga gipasiugdahan sa Cebu Darts Association (CDA) mao ang open three-man team, open doubles ug open singles.
Duwaon karong adlawa ang three-man team event diin mosubay kini og double elimination format. Ang open singles ug doubles ugma pa duwaon pinaagi sa 501 best-of-5 format sa classification phase ug best-of-seven sa finals.
Ang kampiyon ug ang runner-up sa open three-man team ug open doubles makadawat og P6,000 ug P3,000 matag usa.
Ang third ug fourth placers makaangkon og P2,100 alang sa 3-man-team ug P1,600 sa open doubles, samtang ang mopahiluna gikan sa ikalima hangtod sa ikawalo nga dapit mobulsa og P600 matag usa.
Mopatigbabaw sa open singles mobulsa og P5,700, samtang ang runner-up makadawat og P3,000. Ang third ug fourth makaangkon og P1,500 matag usa. Hatagan og P600 matag usa ang mopahiluna gikan sa ikalima hangtod sa ikawalo nga dapit.
Makadawat og consolation prize nga P200 matag usa ang mo-okupar sa ikasiyam hangtod sa ika-16 nga dapit.
Ang entry fee matag usa sa tulo ka event nagkantidad og P150.
Alang sa dugang mga kasayoran, mahimong mokontak ni CDA president Allan Veloso sa 0910-3349415 ug 0925-5555784, Boy Campogan sa 0929-3970062 o di ba ni Mollet sa 0943-6070938. (BANAT PALARO)
- Latest
