UV-SWU showdown moabli sa sinulog cup

CEBU, Philippines - Dagkutan na sab sa University of the  Visayas (UV) Green Lancers ug ang Southwestern University (SWU) Cobras ang  init nilang panagribal, ning higayona dili lang sa dungog, apan sa P50,000 makabungog nga ganti sa Cebu City Mayor's Sinulog Cup 2014 Inter-Collegiate Basketball Tournament karong Enero 23-26 diha sa Cebu  Coliseum.

 "The Sinulog Cup is an invitational tournament that seeks to provide basketball competition and exposure for Cebu’s collegiate teams and to provide entertainment for the fans,"  matud pa ni event organizer Rico S. Navarro atol sa coaches' meeting kagahapon didto sa  Yayoy's  Grill  and  Resto Bar.

 Ang University of San Carlos (USC) Warriors  ubos sa ilang bag-ong coach nga si ex-PBA Junthy Valenzuela ug ang University of San Jose-Recoletos (USJ-R) Jaguars  ni coach Jun Noel gilauman sab nga mopakita'g aksiyon sa upat ka adlaw nga torneyo.

 Dili ikalimod, ang UV Lancers ug SWU Cobras maoy masentro sa liga dili tungod sa kalig-on sa ilang line-up, apan gumikan usab sa ilang mga kagahapon sa lokal nga torneyo.

 Ang Lancers ug Cobras   magsinukdanay dayon sa  ilang abilidad sa opening match sa Enero 23 sa alas-5 sa  hapon.

 Ang UV Lancers ni coach Felix  'Donbel' Belano Jr. mipalagpot sa SWU Cobras sa Cebu  Schools Athletic Foundation Inc. (CESAFI) sa  miaging tuig nga mikulit og rekord isip labing unang koponan nga nakabangon gikan sa 0-2 nga biya ug midaog sa "best-of-five" championship series sa 13 ka tuig nga kasaysayan sa  liga.

 Apan ang SWU Cobras ni legendary bench tactician Raul 'Yayoy' Alcoseba, nakabawos ug gipilde nila ang Lancers aron maangkon ang Southern Islands title ug naghatag kanila'g higayon sa pakigsangka sa mga lig-ong koponan sa nasud sa mas prestihiyosong Philippine Collegiate Champions League (PCCL).

  Ang mga partisipanteng koponan moduwa og single round robin format, diin ang top two teams awtomatik nga magsangka alang sa tinaktakay nga kampiyonato.

 Ang kampiyon mobulsa og P50,000, ang second placer makadawat og P30,000, samtang ang third makaangkon og P15,000.

 Ang mga tiket nga gipaluyohan sa Cebu City Sports Commission (CCSC) nagkantidad og P30 sa upper box, P50 sa lower box ug P100 alang sa general admission.  (BANAT PALARO)