Batan-ong Servania mobida na sab sa Sinulog boxing

 CEBU, Philippines - Ang misulbong nga boksidor  gikan sa Bacolod City nga si Roland 'Momoy' Servania mao na sab ang mobida sa ALA Boxing ug Fitness Gym's "Sinulog Boxing at the Mall" karong Enero 19 diha sa Gaisano Countrymall sa Brgy. Banilad, ning siyudad.

 Harungon ni Servania si Dingdong Quiñones sa General Santos City sa unom ka hugnang "non-title" fight ubos sa bantamweight division.

 Si Servania, ang manghod   ni Genesis 'Azukal' Servania, ang undefeated ALA Gym boxer, kinsa maoy kasamtangang WBO Intercontinental super bantamweight champion.

 Si Roland Servania mao  sab ang mibida sa miaging tuig nga Sinulog boxing atol sa iyang pro debut.

 Sa maong away, si Servania midaog dihang iyang gikulata sud sa upat ka rounds si Joyjoy   Formentera.

 Ang kadaugan nasundan pa og laing upat ka daog  batok ni Andrew Palas sa undercard sa malampusong "Pinoy Pride" card niadtong Abril 25, 2013 diha sa Waterfront Cebu City Hotel and  Casino.

 Gawas  sa Servania-Quiñones fight, laing tulo ka pro bouts ang ilakip sa maong boxing extravaganza.  

 Si Reyme Castellano Aleye   makigbatok ni Rodel Wenceslao sa Mandaue City sa unom ka hugna nga binukbukay sa super featherweight division,  si Jonas Sultan sa Zamboanga del Norte makigsangka ni Marlon Macayan sa Antique sa laing six-rounder fight sa super flyweight, samtang si Jess Rhey Waminal sa Bukidnon makigsangka ni Jerome Baja sa Mandaue sa upat ka hugna nilang sangka sa junior bantamweight.

 Lain pang walo ka sangka ang mokompleto sa maong boxing card nga libre sa tanan. (BANAT NEWS)