Fuentes Andam na sa IBF eliminator
CEBU, Philippines - Garbo sa ALA Boxing Gym nga si Rocky 'Road Warrior' Fuentes (35-6, 20KOs) mosuway pagkab-ot sa iyang damgo nga mahimong world champion sa pakigsangka niya batok ni Puerto Rican knockout artist McWilliams Arroyo sa usa ka IBF flyweight eliminator karong Enero 25 didto sa Humacao Arena sa Puerto Rico.
Ang modaog sa Fuentes-Arroyo fight maoy mahimong "mandatory challenger" alang sa IBF title nga kasamtangang gihuptan ni Moruti Mthalane sa South Africa.
"Hapit na mahuman iyang training camp ug makaingon ko nga anaa na siya sa 100% condition," matud pa ni ALA chief trainer Edito Villamor.
Alang ni Villamor, bisan pa og sila maoy manulong sa teritoryo sa kontra, dili kini makaapekto ni Fuentes. Matud ni Villamor nga adunay halapad nga kasinatian ni Fuentes sa pag-away gawas sa nasud ug napamatud-an kini dihang nakadepensa siya sa iyang OPBF title sa makaunom ka higayon didto sa Japan.
"Salig ko ni Rocky ug sa iyang experience. Kusog siya og mental focus sa iyang mga away mao nang wala mi mahadlok moaway didto sa Puerto Rico," dugang pa ni Villamor.
Sa pagka karon, ang garbo sa Brgy. Mambaling, Cebu City nga si Fuentes nakahimo na og dul-an 100 ka sparring ug lakip sa iyang mga gika-spar mao silang ALA Gym world champions Donnie Nietes ug Merlito Sabillo.
Si Fuentes wala na makatilaw og pilde sukad niadtong 2008 diin anaa usab siya'y 15-fight winning streak.
Dili sab hinuon kakompiyansaan ang kanhi Olympian nga si Arroyo nga maoy nagkupot sa WBC latino flyweight title ug nabaniog nga adunay kusog nga knockout punch. (BANAT NEWS)
- Latest
