Tres ni Aguilar miluwas sa Ginebra

CEBU, Philippines - Usa ka buzzer-beating three-point shot ang gihimo ni Barangay Ginebra San Miguel forward Japeth Aguilar aron makuha ang 83-82 nga kadaugan batok sa Meralco Bolts kagabii didto sa SM Mall of Asia Arena.

 Ang Smart Gilas Pilipinas member maoy nangulo sa rally sa nanghinapos nga  bahin sa duwa nga maoy yawi sa ilang pagsakmit sa ikasiyam nilang daog  uban ang usa ka pilde.    Ang Ginebra mao karon ang nag-una sa standing ug segurado na sa luna sa quarterfinals.

 Tabla ang duwa , 73-all sa katapusang 2:48 human sa tira ni Meralco bigman Reynel Hugnatan, apan mibiya pa ang Bolts  dihang migana ang opensa nila ni Mike Cortez ug Jared Dillenger nga nakapainat sa labaw ngadto sa sayes puntos, 79-73 sa katapusang 1:30.

 Maisip nga usa kini ka sakit  nga kapildihan sa Meralco tungod kay wala nila mamintinar   ang labaw ug hinay-hinay nga nahanaw.

 Si Ginebra coach Ato Agustin nagmaya  sa maong kadaugan tungod kay hingpit na gyud sila nga nakabawos sa Meralco nga maoy bugtong team nga nakapilde nila.

 Kini usab ang ikaduhang game-winning three-point shot ni Aguilar human sa iyang tres   nga maoy mipadaog  sa Ginebra batok sa defending champion Talk ‘N Text Tropang Texters.

 Ang Sugbuanong sentro nga si  Greg Slaughter  mihimo'g double-double alang sa Ginebra pinaagi sa iyang 17 puntos  ug 11 ka rebounds. Si Aguilar  miamot og 15 puntos.

 Si Dillinger maoy leading scorer sa Meralco sa iyang 16 points, samtang si Hugnatan adunay 13 alang sa iyang koponan nga adunay 3-7 win-loss record. (BANAT PALARO)