1st Tuburan chess tourney sugdan sab karong adlawa
CEBU, Philippines - Ipakita na sa mga dekalibre ug tang-ang chess players dinhi sa Sugbu ang tinagoan nilang abilidad sa pag-ulbo sa 1st Tuburan Inter Municipalities and Cities Chess Team Tournament karong adlawa didto sa Tuburan plaza.
Ang torneyo nagtanyag og P80,000 nga ganting salapi ngadto sa mananaog.
Nangamahan sa maong torneyo mao si Tuburan Mayor Democrito 'Aljun' Diamante, kinsa mao usab ang League of Municipalities of the Philippines (LMP)-National Vice President for the Visayas. Abagan kini nila ni event coordinator Marvin Y. Ruelan, FIDE Arbiter Bob Tojong, CPA Rodrigo Ababat ug Brgy. Capt. Vicente T. Bornia Jr.
Gawas sa mga tropeyo, ang kampiyon mobulsa og P30,000, ang second placer makadawat og P20,000 ug ang third makaangkon og P10,000. Ang fourth ug fifth placers makadawat og P6,000 ug P4,000 matag usa. Ang top individual performers makadawat og bonus nga P1,000 matag usa alang sa boards 1 ug 2 ug P750 sa boards 3 ug 4.
Matag team langkuban og upat ka regular players ug usa ka reserve.
Ang duha ka adlaw nga kompetisyon bukas sa tanang lungsod ug siyudad. Mosubay kini og 5-round Swiss system o round robin ang format sa duwa depende sa numero sa mga entrante.
Matag lungsod mahimong mokuha'g usa ka import, kinsa dili botante sa lungsod nga iyang girepresentahan. (BANAT PALARO)
- Latest
