White kampiyon na sa srp sunday club

CEBU, Philippines - Nakabawos ang White team ngadto sa team nga   nakabuling sa ilang rekord, ang Maroon pinaagi sa pag-iskor og daog, 89-79 aron langkaton ang korona sa SRP Sunday Club Christmas League 2013 basketball tournament niadtong Domingo sa buntag didto sa San Roque Parish gym sa Brgy. Subangdaku, dakbayan sa Mandaue.

 Sakit kaayong hunahunaon ang nadangatan sa Maroon kay mao ra kadto ang bugtong nila nga pilde sa kinatibuk-ang dagan sa liga.

 Sayong nanginit ang Maroon aron molansang og tres puntos nga bentaha, 27-24 sa paghuman sa first period.  Apan dali ra sab kining nahilis sa second quarter dihang ang duo nilang Glen 'Dodod' Colina ug Ohing Ortiz milusad og mainitong rally. Miburot pa ang labaw kortesiya sa three-point play ni Colina.  Gikan niadto, nakontrolar na sa White ang duwa, hinuon, adunay higayon nga mo-rally ang Maroon, apan mapugngan gihapon kini sa White ubos sa liderato ni ex-UV Lancer Rene Grafe.

  Sa gilauman, si Colina na sab ang topscorer sa  White nga mipabuhagay og 22 puntos, si Grafe mikandos og 18 puntos, samtang si Ortiz mikimada og 10 puntos.

 Gipangulohan sab gihapon ni Marcial Marturillas ang Maroon pinaagi sa iyang 21 puntos, gisundan ni Duman nga adunay 14 puntos. Wala kaayo makabuylo ang ilang playmaker nga si Richie Tecson diin igo lang siya miiskor og siyete puntos kay gibaylihan kini siya ni Marvin Abatayo.

 Sa sayo pa, ang Blue team nakaikyas sa kulbahinam nilang duwa batok sa Violet, 96-92 aron sakmiton ang third place trophy.

 Tulo ka player sa Blue ang miiskor og dili moubos 20 puntos sa pagpangulo ni Eugenio Povadora nga mihimo'g game-high 26 puntos. Si Dante Orendain miratsada og 22 puntos, si  Fernando Anghay igo gyud nakatugkad og 20 puntos. Si Jejomar Gonzaga miamot og 14 puntos, samtang si SRP Sunday Club president Rom Castañeda mikudlit og sayes puntos.

 Kutas gyud hinuon ang kadaugan sa Blue kay sila ang kanunay naggukod sa unang duha ka kuwarter. Nailog nila ang momentum sa third period.

 Ang Violet gipangulohan ni Hanzel Fick, kinsa mikamada'g 20 puntos, si  Ronnie Alvarado mitimbre'g 18 puntos, samtang sila si Joel Aniñon ug Jay Paciencia parehong mitikdol og 15 puntos. Si Joy Miñoza mitimang og 12 puntos alang sa Violet.

 Nahimong kulbahinam ang duwa dihang nakatabla ang Violet, 92-all human masulod ang marka-bahalang three-pointer ni Bernard Arreglo, apan abtik sab kaayo nakasukli ang Blue aron ilogon pagbalik ang labaw, 94-92. May purohan unta nga makatabla pag-usab ang Violet sa daginutong oras, apan si Hanzel Fick  naatrasaw pagpasa sa bola ngadto ni Jay Paciencia ug nakawat kini ni Povadora alang sa usa ka fastbreak nga maoy naghatag sa White team og kuwatro puntos nga kadaugan. (BANAT NEWS)

PUNTOS MATAG USA

Unang duwa

 BLUE (96) - Povadora 26, Orendain 22, Anghay 20, Gonzaga 14, Castañeda 6, Labares 6, Lipogpog 2.

 VIOLET (92) - Fick 20, Alvarado 18, Aniñon 15, Paciencia 15, Miñoza 12, Arreglo 5, Amora 3, Ouano 2, Pilapil 2.

Ikaduhang duwa:

 WHITE (89) - Colina 22, Grafe 18, Ortiz 10, Ompad 8, Zabate 8, Obenza 6, Abatayo 4, Ardona 4, Cabcaban 4, Pescante 3, Atillo 2.

 MAROON (79) - Marturillas 21, Duman 14, Aton 8, Tecson 7, Pidot 7, Dy 6, Aposaga 6, Duhaylungsod 4, Cariño 2, Supangan 2, Castro 2.