Aguilar Kopico "Rider of the Year"
CEBU, Philippines - Ang multi-titled nga si Glenn Aguilar mao gihapon ang gibayaw isip "Rider of the Year" bisan pa sa bati niyang performance sa final leg sa Kopiko Astig 3-in-one Supercross series niadtong Domingo didto sa South Road Properties (SRP).
Si Aguilar igo lang mipuwesto sa ikalimang dapit, apan tungod sa iyang natigum nga 492 points, uban ang lima ka leg titles sud sa 11 ka legs sa maong nationwide motocross series nakuha niya ang dakung dungog.
Kini ang ika-15 nga ROY award ni Aguilar, apan miangkon siya nga dili sayon ang iyang giagian ilabi na nga nakasugat siya'g lisud nga hagit batok sa Cebuano teen sensation nga si Jon-Jon Adlawan ug Rhowell Mangosong sa Davao. Sila si Adlawan ug Mangosong miangkon sa ikaduha ug ikatulo nga dapit.
May rason hinuon si Mangosong nga maglipay kay siya ang midominar sa pro lite category sa last leg. Si Ambo Yapparcon maoy naghari sa intermediate class, samtang ang anak ni Glen nga si Mclean Aguilar midaog sa beginners, mini ug novice open production titles. Si Bilog Cabaya maoy misakmit sa titulo sa peewee 65 ug 50 cc categories.
Ang uban pang mga mananaog sa tagsa-tagsa ka kategoriya mao sila si Pia Gabriel (women’s), Neil Ytac (underbone), Jed Luna (local enduro), Jeffward Tenorio (open enduro), Dexter Bacbac (veterans A), Ayen Ledesma (veterans B), Roscel Gungob (veterans C) ug Team Gwapo (team race).
Ang Kopiko supercross series gipasiugdahan sa Man and Machine Racing Promotions ug gisuportahan sa National Motorcycle Sports and Safety Association (NAMSSA). (BANAT NEWS)
- Latest
