Chiu, Kong nadala sa Brunei swimfest

 CEBU, Philippines -  Mas sadya ang Pasko sa duha ka Sugbuanong swimmers dinhi sa Sugbu nga silang Val Andre Chiu ug Michael Ichiro Kong gumikan kay gihatagan sila'g luna alang sa Philippine team nga moduwa sa 37th Southeast Asian Age-Group Swimming Championships didto sa Brunei, Darrusalam unya sa Hunyo sunod tuig.

 Silang Chiu ug Kong nalakip alang sa maong internasyonal nga kompetisyon human mopakita'g maayong performance atol sa 4th Speedo G-League Long Course Swimming Championships niadtong miaging semana didto sa Rizal Memorial Sports Complex sa Manila.

 Ang tinun-an sa Sacred Heart School-Ateneo de Cebu (SHS-AdC) nga si Chiu,  naka-gold sa 50m freestyle, silver sa 50m breaststroke ug bronze sa 200m breaststroke.

 Sa iyang bahin, si Kong, varsity player sa University of Cebu (UC) mihakot lang og silver sa 200m butterfly event, apan ang iyang oras igo na kaayo alang kaniya aron makabaton og pasaporte alang sa SEA-ASC.

 Si Karen Mae Indaya, ang bugtong babayeng entrante sa Cebu Blue Marlins (CBM) sa G-League competition mipahiluna sa ikaupat nga dapit sa upat ka events nga iyang giapilan, apan pakyas siya pagkuha sa qualifying time alang sa Brunei meet. (BANAT NEWS)