UV paborito sa Toledo

CEBU, Philippines - Bisan og wala na kanila si Mike Harry Nzesseu, mao gihapo'y giilang title favorites ang University of the Visayas (UV) Green Lancers sa four-team field nga misalmot sa 1st Mayor Sonny Osmeña Cup Inter-Collegiate Basketball Tournament nga ipahigayon karong Disyembre 18-21 didto sa Toledo City.Ang maong torneyo gitawag og "Halad sa Pasko sa Toledohanon", ug gihimo kining libre alang sa mga molupyo sa Toledo nga mahiligon kaayo sa basketball ug nagtangag kini'g kinatibuk-ang ganting cash nga P180 thousand cash prize diin pulos gyud adunay madawat ang upat ka teams.

Tungod kay mipahawa na man si Nzesseu, si Steve Cedrick Akomo na maoy mangu sa kampanya sa Lancers kinsa maoy bag-ong hari sa Cebu Schools Athletic Foundation, Inc. (CESAFI)  ug niadtong higayona, si Nzesseu maoy usa sa yawe sa kadaugan atol sa finals diin makab-ot sa Lancers ang ilang ikanapulo nga titulo nga maoy labing daghan sa bisan kinsa nga CESAFI-member school.

Gawas sa UV, ang laing tulo ka teams nga kumpirmadong misalmot mao ang University of San Carlos, Goodson College Basketball ug ang host Toledo Collegiate All-Star ni coach Elmer "Boy" Cabahug.

Ang format sa maong torneyo mao ang single round robin series diin ang top two teams maoy magsangka sa finals ug ang nagsunod nga laing duha ka teams maoy mag-ilog alang sa ikatulong pwesto.

Ang mga organizers sa maong torneyo nga gipangulohan ni Jimboy Tiongco, nagkanayon nga sayong sugdan ang opening ceremony unya sa Disyembre 18 tungod kay mohatag og mensahe si Mayor Osmeña sa alas kuwatro sa hapon ug mosunod dayon ang bunotay aron pagsuta sa duha ka teams nga moduwa nianang gabhiona.

Usa si Tiongco nga maoy naningkamot og maayo aron mahinayon gyud ang maong torneyo ug iyang giklaro nga ang tanang gasto lakip sa premyo, pulos gikan sa mga private individuals ug mga corporate sponsors.

Ang commissioner sa maong torneyo mao si Estoy Jaranilla, kinsa kanhi sab collegiate varsity player ug ang technical committee gipangulohan ni Edwin Dejacto.  (BANAT PALARO)