Marquez angay una suwayan

CEBU, Philippines - Gusto ni Hall of Famer trainer Freddie Roach nga suwayan una si Mexican Juan Manuel Marquez sa dili pa nila ipamugos ang usa ka ‘fifth fight’ batok sa iyang ‘prized fighter’ nga si Manny Pacquiao.

Si Roach nasayud nga dili pa moretiro si Marquez ug gusto pa niini nga moaway, apan sa dili pa hisgutan ang posibilidad sa laing sangka niini ni Pacquiao, ang Amerikanong trainer gusto usa nga sangkaon ni Marquez ang lain niyang boksidor nga si Ruslan Provodnikov.

Human sa kapildehan niini ni Tim Bradley, si Roach nagtuo nga huyang na ang abilidad ni Marquez ug gusto niya nga mapamatud-an kini pinaagi sa pagkulata ni Provodnikov sa Mexican legend.

Gisugyot ni Roach nga ang Marquez-Provodnikov fight ibutang isip support main-event sa gusto niyang WBO welterweight showdown tali ni Bradley ug Pacquiao sa Abril.

“If Manny fights Bradley in April, why not put Marquez in the same card? I think a Marquez fight against Provodnikov would be terrific. If both Manny and Marquez win, they could fight again and settle their rivalry once and for all,” matud pa ni Roach sa The Philippine Star.

Si Roach daku'g salig ni WBO light welterweight king Provodnikov nga masuwayan kun aduna pa bay ikabuga si Marquez.  (BANAT PALARO)