3 ka Sugbuanong swimmers moapil sa G-League tilt

CEBU, Philippines -  Tulo ka Sugbuanong swimmers ang molangoy sa 2013 G-League National Long Course  Swimming Championship karong weekend didto sa Rizal Memorial Sports Complex sa Manila.

 Naglakip kini nilang Michael Ichiro Kong ug Karen Mae Indaya sa University of Cebu (UC) ug Val Andre Chiu sa Sacred Heart School-Ateneo de  Cebu (SHS-AdC).

 Napilian sila ni Cebu Blue Marlins (CBM) head coach Rolando Alvarez nga palanguyon sa nasudnong kompetisyon human sa impresibo nilang performance sa tanang regional legs sa G-League.

 Si  Andaya mopakita sa iyang labok sa girls 13 age group, si Kong sa boys 14 ug si Chiu sa boys 12.

 Matud pa ni Alvarez nga aduna sila'y  dakung purohan nga modaog og mga  medalya tungod kay nakuha nila ang qualifying times nga gitakda sa mga tigpasiugda. (BANAT PALARO)