SWU SUD sa finals

CEBU, Philippines - Mikulit og kasaysayan ang  Southwestern University (SWU) Cobras dihang miabante sila sa Philippine Collegiate Champions League (PCCL) finals pinaagi sa paglubong sa Far Eastern University (FEU) Tamaraws, 86-71 kagahapon didto sa FilOil Flying V Arena sa San Juan Arena.

  Miabante sa Philippine Collegiate Champions League (PCCL) finals sa labing unang higayon ang Southwestern University (SWU) Cobras human sila mokulit og impresibong 86-71 nga kadaugan batok sa Far Eastern University (FEU) Tamaraws kagahapon didto sa San Juan Arena.

 Suwayan sa Cobras nga mahimong labing unang provincial team nga modaog og titulo sa PCCL dihang ilang ikasangka ang Dela Salle University (DLSU) Green Archers sa "knockout finals" karong Lunes.

 Naangkon sa La Sale ang ikaduhang luna sa finals human sila makaipsot batok sa NCAA champion San Beda (SB) Red Lions sa iskor nga  64-60 pinaagi sa mga krusyal kaayong puntos nilang Jeron Teng, Almond Vosotros ug ang insurance basket sa Fil-Am nga si Jason Perkins.

 Ang Cobras kinsa maoy Southern Islands champion sa PCCL Sweet 16 eliminations dinhi sa Sugbu daku'g purohan nga mahimong  unang Cebu-based team nga modaog sa titulo kay sa una nilang sangka sa La Salle ila pa kining gipilde sa iskor nga 68-58.

 Si Monbert Arong maoy nahimong "best player"  sa duwa sa iyang 23 puntos, pito ka rebounds, lima ka assists ug duha ka steals.

 Balanse nga ataki ang nahimong yawi sa kadaugan sa SWU Cobras sa pagpangulo ni Monbert Arong, kinsa  mibugwak og 23 puntos, samtang ang Cameroonian  nga si Larry Sanjo  mirehistro og 19 puntos ug silang Mark Jayven Tallo ug Adam Mohammed  miamot og 16 ug 15 puntos matag usa.

 Naglabaw pa og nuybe puntos ang FEU batok sa SWU, 15-6 sa first period, apan misumbalik sila og ataki aron mailog ang labaw sa second period sa iskor nga 27-23 sa pagpangulo nila ni Melvin Holper ug Arong.

 Gipatabanan usab og hugot nga depensa sa SWU ang init nilang opensa nga miresulta sa pagburot sa ilang labaw ngadto sa 43-27 paingon sa second half.

 Mi-rally ang FEU aron makan-an  ang labaw ngadto na lang sa 10 puntos sa iskor nga 40-50 sa nahabiling 4:30 sa third period, apan dali ra usab misukli'g mga puntos  ang SWU nga buynas sab kaayo  ilang outside shooting aron moposte og 15 puntos nga labaw paingon sa final period.

 Si Gryann Mendoza maoy topscorer sa FEU sa iyang 16 puntos, samtang si Carl Cruz ug Mike Tolomia nagkumboya'g 30 puntos ug si Anthony Hargrove mitampo'g 10 puntos ug 10 sab ka rebounds.

 Sa higayon nga dili buligan sa kapalaran ang Cobras, ilang matablahan ang runner-up finish kaniadto sa University of the Visayas (UV) Green Lancers kinsa maoy second placer sa PCCL sa tuig 2007 dihang gipilde sila sa Ateneo Blue Eagles sa finals sa iskor nga 54-71.

 Duha sab ka higayon nga naangkon sa UV ang third place niadtong inaugural season sa 2002 diin co-third placer sila ug ang University of Sto. Tomas. Niadtong 2004, napilde sab ang Green Lancers ngadto sa University of the East, 64-65 nga maoy labing sikit nga resulta sa kasaysayan sa PCCL. (BANAT PALARO)