Lions midaog sa Cobras
CEBU, Philippines - Gipanamastamasan sa reigning NCAA champion San Beda (SB) Red Lions ang garbo sa Sugbu nga Southwestern University (SWU) Cobras pinaagi sa paglubong, 77-49 nga nakapabuhi sa ilang paglaum alang sa semifinals sa 12th Philippine Collegiate Champions League (PCCL) kagahapon didto sa The Arena sa San Juan City.
Gilupig ni Nigerian Ola Adeogun ang iyang kababayang Aprikano nga si Landry Sanjo ug Fabrice Siewe aron tabangan ang Lions pag-ingkit sa ilang unang daog niining single-round robin semis human mapilde sa Far Eastern University (FEU) Tamaraws, 56-62 sa miaging adlaw didto sa Blue Eagle Gym.
Si Adeogun maoy mikumbati'g maayo sa tibuok duwa aron pangulohan ang San Beda human mopabuto og 22 puntos, uban ang 11 ka rebounds, tulo ka blocks ug duha ka assists. Iyang napuhalan ang tandem nilang Sanjo ug Siewe, kinsa nagkumboya og 22 puntos ug siyam ka rebounds.
Si San Beda coach Boyet Fernandez mipatuman sa iyang hugot nga depensa nga naghatag og kalisud sa Cobras pag-iskor.
Ang reigning CESAFI MVP nga si Mark Jayven Tallo, Monbert Arong, Adams Mohammad ug Daryl Holper wala makaarte diin nagkumboya lang sila og 12 puntos human nagtambayayong og 51 puntos sa ilang 68-58 nga kadaugan batok sa UAAP titlist La Salle Archers niadtong Lunes.
"We knew SWU is a very dangerous team after beating a powerhouse team like La Salle so we made it a priority to shut their shooters down," matud pa ni San Beda coach Boyet Fernandez sa Philippine Star.
Ang kadaugan nakapabuhi sa San Beda alang sa titulo dihang nagtabla sila sa SWU sa managsamang 1-1 win-loss records.
Kun modaog ang San Beda batok sa La Salle sa katapusang duwa sa semis ugma maghatag kanila og higayon pag-angkon og luna sa "best-of-three" finals nga sugdan sa Lunes ug ang mosakmit sa korona mobulsa og P100,000.
Sa ilang bahin, ang SWU ni coach Raul 'Yayoy' Alcoseba hugtanong nagtinguha nga mahimong labing unang koponan gawas sa National Capital Region (NCR) nga maghari sa tinuig nga torneyo sa higayon ilang mapilde ang FEU.
Puntos matag usa
San Beda (77) - Adeogun 22, Pascual 14, dela Cruz 10, dela Rosa 8, A. Semerad 7, Amer 5, Sara 3, Ludovice 2, Villaruz 2, Mendoza 2, D. Semerad 1, Abatayo 1.
SWU (49) - Sanjo 13, Siewe 9, Goloran 8, Mohammed 6, Bautista 3, Tallo 2, Ortega 2, Holper 2, Arong 2, Bregondo 2. (BANAT NEWS)
- Latest
