White, Maroon ilog sa No. 1 spot sa SRP Sunday Club

 CEBU, Philippines - Duha ka walay pildeng koponan ang mag-abot alang sa krusyal nilang duwa  sa SRP Sunday Club  Christmas League 2013 basketball tournament karong adlawa diha sa San Roque Parish gym sa barangay Subangdaku, Mandaue City.

 Ang White ug Maroon nga  kasamtangang nagsawo sa liderato sa managsama nilang 6-0 win-loss records magsangka sa alas-10 sa buntag.

 Apan sa dili pa ang ilang sangka, magsangka una alang sa  pasiunang duwa ang defending champion Blue team ug ang dinaog-daog nga Black sa alas-8 sa buntag. Sundan dayon sa non-bearing game tali sa Red ug Gray sa alas-9 sa buntag.

 Hinugtanay sa bakus ang mahitabong  duwa karon gumikan kay ang duha ka koponan pulos man nangahas pagsakmit sa unang dapit human sa elimination.

 Ang White team maghangad sa katakus sa ilang shooters nga silang Glen 'Dodod' Colina, Alex Cabase, Robert Sagayno, Melvin Abatayo ug Ohing Ortis uban sa ilang sentro ug kanhi UV Green Lancers Rene  Grafe.

 Atbangan sab kini sa Maroon, kinsa nagsalig  nilang Richie Tecson, Benito Aton, Dindo Aposaga ug sa sentro nilang si Mariano Marturillas.

 Ang modaog makigsangka sa No. 4 sa crossover semifinals, samtang ang mapilde makigtakus sa No. 3.

 Sa main game sa alas-11:00 sa buntag,  magtinaktakay ang Violet ug  Green alang sa katapusang luna sa magic four.

 Ang Violet naglaum sa trayanggulo nilang Bernard Arreglo, Ronnie Alvarado ug Hanzel Fick alang sa ilang opensa. Samtang ang Green magsalig ni Larry Lauron uban nilang Gideon Ipili ug Abaño.

 Ang tinuig nga liga ubos sa pagdumala sa ilang presidente Rom Castañeda gisuportahan ni  Subangdaku Brgy. Capt. Ernie Manatad ug councilor Amay Dy.