CEBU, Philippines - Dili na kapugngan ug madayon na gyud ang pagpahigayon sa 16th Aboitiz Football Cup karong adlawa diha sa Aboitiz Sports Field sa barangay Subangdaku, dakbayan sa Mandaue.
Adunay 155 ka teams ang mopakita'g aksiyon ning tuiga bisan pa og kaduha kini giuswag tungod sa duha ka kalamidad nga nakaapekto sa Cebu lakip ang 7.2 magnitude nga linog niadtong Oktubre 15 ug ang bagyong "Yolanda" niadtong Nobiyembre 8.
Ang boy's 11-under category maoy adunay daghang entrante nga adunay 22 ka koponan, gisundan sa boy's 13-under ug 9-under nga adunay 20 ka teams matag usa. Ang 7-under adunay 16 ka koponan, samtang ang men's open ug 18-under adunay tag-15 ka koponan.
Lain pang mga kategoriya nga banatan sa maong torneyo ubos sa bendisyon sa Philippine Football Federation mao ang 38-above, Inter-BPO, girl's 15-under ug girl's 18-under.
Adunay 15 ka duwa ang duwaon karong adlawa.
Ang torneyo matapos sa Abril 30 sunod tuig diin ang mga duwa ipahigayon matag weekends. (BANAT NEWS)