MJDL Brokers kampiyon sa 1st CIPU-BOC cagefest
CEBU, Philippines - Giluwas ni Janus Abellana ang MJDL Brokers pinaagi sa iyang undergoal stab sa katapusang siyete segundos aron maka-eskapo batok sa Rollway-Petracorta Brokers, 84-82 ug ingon man masakmit ang titulo sa 1st CIPU-BOC Fellowship Cup basketball tournament niadtong Miyerkules sa gabii didto sa Cebu Coliseum.
Sa sayo pa, midaog ang ROSCAN Liners batok sa Global Carrier, 85-71 aron sab maangkon ang ikatulong pwesto.
Sayong nanginit ang MJDL Brokers diin ilang gitapos ang first period sa iskor nga 24-12.
Nabiyaan sab ang Rollway-Petracorta sa tunga-tungang bahin sa fourth period, 62-71, apan dali sab kini nilang gipapas kay silang Allen Tarona ug Takloy Moral nagbanos-banos himo'g three-point play.
Gitawgan og technical foul si Shun Cal human siya moreklamo dihang iyang gi-foul si Tarona sa nahabiling 3:03 sa duwa.
Napasulod ni Tarona ang upat niya ka free throws aron makasikit, 72-73.
Nahimong kulbahinam ang duwa human makatabla ang Rollway-Petracorta, 82-all human sa split charities ni Moral sa katapusang 34.2 segundos.
Nabutang sa delikadong sitwasyon ang MJDL Brokers human misipyat si Baeng Medalle sa iyang pasa, apan naluwas sila ni Abellana, kinsa nakakita'g "mismatch" sa ilawom batok sa mas mubo nga pointguard nga si Billy Sagario sa daginutong oras.
Si Daniel Enriquez maoy nangu sa MJDL sa iyang 23 puntos, si Abellana midugang og 15 puntos ug si Medalle miamot og 12 puntos.
Gipangulohan sab ni Tarona ang Rollway-Petracorta pinaagi sa iyang 31 puntos, gisundan ni Moral nga adunay 14 puntos, samtang ang team owner nga si Melchor Petracorta mitampo'g 10 puntos.
Ang CIPU-BOC Fellowship Cup proyekto nilang Boodie Monteño sa Customs Portmen, Jef Garcia sa Ynah Brokers ug Noel Medalle sa MJDL.
PUNTOS MATAG USA
Unang duwa:
ROSCAN Liners (85) - Cayanong 19, Singson 18, Villa 15, Dellosa 9, Cabañero 7, Sillar 6, Sigue 4, Generalao 4, Boniao 2, Bensi 1.
Global Carrier (71) - Maningo 15, Aniñon 11, Cedeño 10, Castro 7, Caynita 5, Tandas 4, Labrador 3, Cabillada 2, Diaz 2.
Ikaduhang duwa:
MJDL Brokers (84) - Enriquez 23, Abellana 15, B. Medalle 12, Rollon 9, Largosa 7, Elloren 7, Laborte 6, Cal 2, Arreglo 1.
Rollway-Petracorta (82) - Tarona 31, Moral 14, Petracorta 10, Urbina 8, Villaronza 6, Saragino 4, Sagario 3, Palero 2, Pangangdang
2, Dela Pieza 2. (BANAT PALARO)
- Latest
