4Cents 2nd Strike Open chess tourney sa Disyembre 14-15
CEBU, Philippines - Sa makausa pa, ang mga bata ug edaran nga chess players dinhi sa Sugbu, magsinukdanay na sab sa tagsa-tagsa nilang abilidad sa ipahigayong Four Central Squares (4Cents) 2nd Strike Open Chess Tournament nga gikatakda sa Disyembre 14-15 diha sa Robinsons Fuente Event Center.
Ang unang adlaw sa kompetisyon igahin sa kiddies division (14-anyos ug paubos), samtang ang open category banatan pagka sunod adlaw.
Ang National Chess Federation of the Philippines (NCFP)-rated tournament mosubay sa 7-round Swiss system format gamit ang game point scoring system.
Ang kampiyon sa open division makadawat og P4,000 ug tropeyo, ang second placer mobulsa og P3,000, ang third ug fourth placers makaangkon og P2,000 ug P1,000 matag usa.
Mopahiluna gikan sa ikaunom hangtod sa ikanapulo nga dapit makadawat og consolation prize nga P500 matag usa ug ingon man ang top female entry.
Sa laing bahin, ang top performer sa kiddies class mobulsa og P3,000 ug tropeyo, ang ikaupat ug ikalima makadawat og P500 matag usa, samtang ang sixth hangtod sa 10th hatagan og P300 matag usa. Ang best finisher sa female participants makadawat og bonus nga P500.
Ang registration fee nagkantidad og P150 alang sa kiddies ug P200 sa open.
Alang sa dugang pang mga kasayoran, mahimong mokontak ni tournament director Eduard de la Torre sa 0932-8622010 ug FIDE Arbiter Felix A. Poloyapoy Jr. sa 0933-6642958. (BANAT PALARO)
- Latest
