SHS-AdC, USC mag-ilog sa liderato sa NBTC Elite League

CEBU, Philippines -  Mag-ilog sa solong liderato ang Sacred Heart School-Ateneo de Cebu (SHS-AdC) Magis Eagles ug ang University of San Carlos (USC) Baby Warriors sa Seaoil National Basketball Training Camp (NBTC) Elite League karong Domingo diha sa University of San Jose-Recoletos (USJ-R)-Basak campus, ning siyudad.

 Ang Magis Eagles ni coach Roel  Rasmo misugod sa ilang kampanya pinaagi sa pagdemolis sa Don Bosco Technology Center

(DBTC) Greywolves, samtang ang Baby Warriors ni coach Brit Reroma mingmasaker sa Abellana National School (ANS).

 Ang SHS-AdC ug USC magsangka sa alas-4 sa hapon human sa duwa sa University of the Visayas (UV) Baby Lancers, kinsa naglaraw mosakmit sa ilang ikaduhang sunod-sunod nga daog batok sa ANS sa alas-2:30 sa  hapon.

 Gisugdan sa UV Baby Lancers  ang ilang kampanya alang sa korona pinaagi sa paglubong sa USJ-R Baby Jaguars sa iskor nga 69-53.

 Sa opening game sa ala-1 sa  hapon, ang USJ-R ug DBTC nga nangapilde sa una nilang duwa, magsangka uban sa usa'g-usa uban ang paglaum nga modaog.

 Unom lang ka koponan ang mopakita'g aksiyon sa torneyo gumikan kay ang Cebu Eastern College (CEC) Dragons ug University of Southern Philippines Foundation (USPF) Baby Panthers wala tugti pagsalmot kay wala kini makatambong sa coaches' convention niadtong Oktubre.

 Ang torneyo ipaagi og single round robin format sa elimination diin ang top four teams moabante sa crossover semifinals. Ang modaog maoy mag-abot sa kampiyonato pinaagi sa "best-of-three" series.

 Ang kampiyon makaangkon og katungod nga morepresentar sa Sugbu alang sa National Finals nga gikatakda sa Marso 6-9 sunod tuig didto sa Manila. (BANAT PALARO)