Maroon pabiling walay pilde sa SRP Sunday Club

CEBU, Philippines -  Nagpabilin gihapon nga walay pilde ang Maroon team dihang misilhig na sab kini og daog batok sa Red, 87-76  sa nagkainit nga aksiyon sa SRP Sunday Club Christmas League 2013 basketball tournament sa miaging adlaw didto sa San Roque Parish gym sa barangay Subangdaku, dakbayan sa Mandaue.

 Maayo pagkabahin ang puntos sa Maroon diin 11 sa ilang mga players ang nakaiskor human nila gihamag pag-ayo ang Red team.

 Gipangulohan kini ni Benito Aton, kinsa miduslit og 18 puntos, gisundan ni Richie Tecson nga mipugnit og 15 puntos.

 Maayo sab nakaduwa si  Dindo Aposaga nga mitimbre og  14 puntos alang sa Maroon nga kasamtangang nagbitbit og limpiyong baraha nga 6-0.

 Lima unta ka players sa Red team ang mihimo'g double-figures, apan nakawang lang ang ilang mga paningkamot kay ilang giusikan ang kahigayonan sa pagdaog dihang nakahimo sila'g mga turnovers sa nanghinapos nga bahin sa duwa.

 Ang sentro sa Red team nga si Ruben Flores maoy kinadak-ang iskor nga nakuha alang sa Red pinaagi sa iyang 20 puntos, nagsunod si Rey Narte nga adunay 15 puntos, gisundan ni Robert Cabunillas nga mihirit og 13 puntos, samtang sila si Roldan Baloro ug Pestaño miamot og 12 puntos matag usa.

 Sa laing aksiyon, ang Violet walay puangod nga milubong sa Black team sa iskor nga 86-56.

 Si Hanzel Fick miiskor og 12 puntos, sila si Bernard Arreglo ug Ronnie Alvarado parehong mitikdol og 10 puntos alang sa Violet nga maoy nikontrolar sa kinatibuk-ang duwa.

 Miagak sa opensa sa Black team mao  si Romeo Castardo nga mihimo'g  game-high 20 puntos ug ang  torotoy apan idlas nga si Edok Peligro sa iyang 12 puntos. (BANAT NEWS)

PUNTOS MATAG USA

Unang duwa:

 MAROON (87) - Aton 18, Tecson 15, Aposaga 14, Marturillas 8, Duman 6, Duhaylungsod 6, Supangan 6, Cubero 3, Cariño 2, Gorgonio 2 Tito 2.

 RED (76) - Flores 20, Narte 15, Cabunillas 13, Baloro 12, Pestaño 12, Dialogo 4.

Ikaduhang duwa:

 VIOLET (86) - Fick 12, Arreglo 10, Alvarado 10, Paciencia 8, Amora 6, Pilapil 6, Miñoza 6, Pelarios 4, Migallen 2, Ouano 2, Melencio 2.

 BLACK (56) - Castardo 20, Peligro 12, Aventajado 6, Chin 6, Fontanosa 5, Supangan 4, Teody 2.