Bye, bye Danny I.

Kining wala pag-renew sa kontrata ni Danny Ildefonso sa management sa Petron Blaze Boosters, nagpasabot ba kini nga natapos na ang iyang career isip usa ka superstar player sa PBA?

Dili seguro nato matawag nga bata pa kaayo kini si Danny I. apan kung duwa lang maoy hisgotan, kumbensido ako nga duna pa gyud siya'y ikabuga. Hayan makahatag pa siya'g kampyonato.

Nabaniog nga mobalhinay na si Danny I. sa Talk 'N Text Tropang Texters ug bukas ang mga bukton ni team owner Manny V. Pangilinan sa paghangop kaniya. Andam sab si coach Norman Black ug mga players sa Tropang Texters nga mahimo na nilang teammate ang kanhi two-time MVP nga maoy unang nagpauso anang aksyon nga daw nag-alsa og barbell nga gitawag ni kanhi PBA commentator ug kanhi sab commissioner Noli Eala nga "raise the roof."

Hinoon, nagkanayon si Danny I. nga wala pa siya'y kasayuran kalabot sa gikatahong pagtapon ngadto sa Tropang Texters.

Usa ako sa mga minilyon ka fans nga nagsunod sa San Miguel Beer franchise sa PBA sa miaging dul-an upat na ka dekada gikan pa nilang Mon Fernandez (a.k.a. El Presidente and Karla's hubby) Manny Paner, Yoyong Martires alyas Waray, Estoy Estrada, Dodie Miego (ex-SWU coach) ug daghan pang uban nga Sugboanon.

Nagsunod sab ako kanila dihang nagduwa pa sa Beermen silang Allan Caidic, Samboy Lim, Franz Pumaren, Yves Dignadice, Alvin Teng, Hector Calma ug ang Sugboanon nga akong higalang wa'y paglubad nga si Melchor "Biboy"  Ravanes.

Paglabay sa laing henerasyon, pabilin akong San Miguel fan dihang nagduwa pa si Dondon Hontiveros, Olsen Racela, Danny Seigle ug si Danny I.

 Matag higayon nga moabante sa finals ang San Miguel, kauban ako nila sa ilang kadaugan kay kanunay man akong mopusta ug apil sab ako sa ilang kapildehan.

Niining kontrobersiya nga giatubang karon ni Danny I. malooy ako kaniya ilabi na gyud kay talisawop na man ang iyang career. Mao unta'y iyang gusto nga anha siya mo-retiro uban sa San Miguel nga karon gi-ila na nga Petron.

Gusto siya nga makaduwa bisan na lang unta og usa lang ka Conference ilabi na karon kay All-Filipino kon Philippine Cup. Gusto niyang mopahawa sa Petron nga walay gihambin nga pagmahay.

Na-silu ang management kang Ildefonso tungod sa iyang pamahayag sa usa ka interview dili pa lang dugay nga nagkwestyon sa management sa pag-ilis og ngan sa franchise ug ingon man sa pag-ilis og coaching staff  ug mga players.

Wala lugwayi ang iyang kontrata sa Petron nga natapos niadtong Oktubre ug maoy laraw karon ni Ildefonso nga makig-estorya kang SMC president Ramon S. Ang kalabot sa iyang kahimtang karon.

Walay igong rason nga giluwatan ang management apan matod pa  nga wala makauyon si Ang sa iyang mga gipamulong. Karon untang tuiga matapos na ang career ni Danny I. uban sa Petron ug kabahin na unta siya sa coaching staff sa umaabot nga mga adlaw nga maoy sagad mahitabo sa mga players sa San Miguel sa higayon nga sila mo-retiro.

Buot nang mangayo'g pasaylo si Ildefonso ngadto kang Ang nga iyang gitawag og Boss RSA aron iyang hisayran kung unsay laraw sa team ngadto kaniya. Makatandug sa balatian dihang nagkanayon si Danny I. nga gusto siyang matapos ang iyang career uban sa Petron.  

Gani karong bag-o, usa siya sa naghatag og inspirasyon ngadto sa Sugboanong si June Mar Fajardo nga kanunay iyang gimaymayan ug kanunay niyang gidayeg ilabi na kay sentro sab ang position sa 6'6 nga si Danny I., ang garbo sa Pangasinan kinsa MVP kaniadtong 2000 ug 2001.

Laing nakapahimuot kanako karong bag-o lang dihang midayeg si Gregg Slaughter sa Ginebra San Miguel ngadto kang Fajardo dihang mi-iskor kini'g 21 puntos ug may 23 ka rebounds batok sa San Mig Coffee, 91-78 kaniadtong Miyerkules. Silang Fajardo ug Slaughter higpit nga karibal sa CESAFI isip sentro sa ilang tagsa-tagsa ka team---si Fajardo sa UC Webmasters ug si Slaughter sa UV Green Lancers ug pareho silang nakahatag og duha ka korona alang sa ilang team.

Sa gidangatan karon ni Ildefonso, usa lang ka leksyon ang iyang nakat-onan. "Ayaw panghilabot sa hukom sa management."