Nietes daog via TKO
Quezon City , Philippines —Gipakita ni Donnie ‘Ahas’ Nietes (32-1, 18KOs) nga angayan siya nga malakip sa lista sa mga labing ngilngig nga Pinoy boxing champion sa nasud human niya madepensai ang iyang WBO light flyweight title pinaagi sa third round TKO batok ni former Mexican world champion Sammy ‘Guty’ Gutierrez (33-10, 23KOs) sa main event sa ‘Pinoy Pride XXIII:Filipinos Kontra Latinos’ niadtong miaging gabii didto sa Smart Araneta Coliseum.
Si Nietes miduol sa kasaysayan dihang nagkinahanglan na lang siya og usa ka tuig aron matupngan ang record ni anhing Gabriel ‘Flash’ Elorde kinsa maoy labing dugay nga nahimong kampiyon sa kasaysayan sa Philippine boxing sud sa pito ka tuig.
Dala ang saad nga mudaog alang sa iyang mga kababayan ilabi na sa mga biktima sa bagyong ‘Yolanda’, si Nietes agresibo nga mibanat sa Mexican kinsa natumba niya og kaduha sa first round.
Nakarekober hinuon si Gutierrez sa misunod nga round diin nakapasud usab siya og kaugalingon niyang mga kinumo ngadto ni Nietes.
Hinuon, bisan pa niini wala makuhai ang kaagresibo ni Nietes ug subli niyang gipauwanan og kombinasyon ang Mehikano kinsa misuway og sukol apan nasugamak lang dihang masugati sa bangis nga left straight gikan sa ALA Gym fighter.
Daling nahagsa ibabaw sa ring si Gutierrez diin gisuwayan siya og ihap sa reperi, apan wala na kini makarekober nga maoy nakapaaghat ni referee Celestino Ruiz sa pag-undang sa away sa 2:58 sa third round.
“Gusto gyud ko ug paspas ug impresibo nga daog ug nalipay ko nga ako ni nabuhat,†matud pa ni Nietes kinsa nagkupot na og world title sugod pa niadtong tuig 2007.
Sa maong kadaugan, gipakita usab ni Nietes nga andam na siya alang sa usa ka rematch batok sa iyang Mexican rival nga si Moises Fuentes kinsa iyang atubangon pag-usab sa Abril sa Singapore o Macau .
“Nietes is a guy who understands the game so much,†matud pa ni ALA Promotions CEO Michael Aldeguer. “We are now looking on a rematch between him and Fuentes in Singapore or Macau in April.â€
Sama ni Nietes, napanalipdan usab ni WBO minimumweight champion Merlito ‘Tiger’ Sabillo (23-0-1, 12KOs) ang iyang bakus, apan dili kini sayun tungod kay igo ra siyang nakakuha og split draw decision batok sa lig-ong Nicaraguan nga si Carlos Buitrago (27-0-1, 16KOs)
Usa ka brutal nga gera ang nahitabo tali sa duha ug human sa sangka tulo ka mga hurado ang nakaumol nga desisyon nga draw.
Si Judge Levi Martinez mihatag og 115-113 ngadto ni Buitrago, Joerge Milke mipabor ni Sabillo 115-113 ug si Takeshi Shimakawa nakahukom nga tablahon ang iskor 114-all.
“Lisud siya (Buitrago) nga kontra moangkon ko naglisud ko pero ako gihatag tanan aron mudaog,â€matud pa ni Sabillo. “Andam ko kun adunay rematch.â€
Midaog pinaagi sa unanimous decision ang kanhi world title challenger nga si Milan ‘El Metodico’ Melindo (30-1, 12KOs) batok ni Mexican Jose Alfredo ‘Torito’ Rodriguez aron depensaan ang iyang WBO International flyweight belt.
Gidominaran usab ni Jason ‘El Niño’ Pagara (32-2, 12KOs) ang iyang sangka batok ni Vladimir Baez (19-2, 17KOs) sa Dominican Republic alang sa WBO International light welterweight title.
Kumbinsido usab ang unanimous decision nga kadaugan ni AJ ‘Bazooka’ Banal batok sa Puerto Rican nga si Lucian Gonzales.
Laing ALA fighter nga nakahimo og knockout mao si Jimrex Jaca kinsa mipaundang sa Indonesian Wellem Reyk sa first round pinaagi sa usa ka body shot. (BANAT PALARO)
- Latest
