Sugdan na ang aksiyon

CEBU, Philippines - Higpit ug kulbahinam nga aksiyon  sa   5th Milo Little Olympics National  Finals  ang  kumbatihan  karong adlawa diha sa Cebu  City Sports  Center (CCSC).

 Ang  mga  kadagkuan sa delegasyon sa  Luzon ug Mindanao mipadayag nga bisa'g  tungason ang  ilang  dalan alang sa overall  title,  baktason gihapon kini nila  aron  masurprisa ang mga  paborito  nga  pangulohan sa defending champion National Capital Region (NRC) ug grandslam titlist Visayas.

 Si Tess Bernardino, ang daku-daku sa Luzon delegation  namahayag nga andam na sila sa ilang subling  paghari sa taekwondo ug swimming ug ingon man sa elementary ug secondary boys volleyball, chess ug scrabble.

 "Nakapag-adjust na din yun mga bata especially yung mga swimmers namin na sa Baguio nag-training. Tapos yung elementary boys namin sa volleyball from Bolinao Pangasinan, sila yung champion sa Palaro (Palarong Pambansa) so kung mananalo kami sa mga sports na sinabi ko, may chance din kami sa overall siguro,"  sumala pa  ni Bernardino.

 Sa iyang bahin, si Megronio Llamera sa Mindanao, naglaum    sa iyang mga batos sa elementary ug secondary boys basketball ug football, elementary taekwondo ug secondary girls volleyball.

 "Ang among elementary boys in basketball champion sila sa Palaro nya ang secondary girls in volleyball top four pud sa Palaro so naa sad gyu'y events na daku mig chance mag-gold,"  saysay ni Llamera.

 Ang host Team Visayas nga gipangulohan ni Ricky  Ballesteros nagsalig sa ball games ug ingon man sa chess, taekwondo ug scrabble.

 Si  Ballesteros  naglaum nga ang mga atleta sa Sugbu makarekober  human  gitay-og og  7.2  magnitude  nga  linog  ug  sa pagkuso-kuso sa bagyong Yolanda aron maghari pag-usab sa MLO.

 Pakyas ang team Visayas pagsakmit sa overall championships human mapilde ngadto sa NCR sa miaging tuig. Ang NCR mipupo og 294 puntos, samtang ang Visayas miani'g  283 puntos.

 Hinuon, si  Dr. Robert Calo mipahibalo nga ang NCR mopadala sa ilang "second stringers" tungod kay pipila sa nag-unang mga eskuylahan gidid-an pagsalmot sa ubang mga events samtang nagpadayon pa ang UAAP ug NCAA season, samtang ang uban gihulipan kay dili kini maapil tungod kay conflict sa schedules.

 Bisan pa niana, ang NCR pabilin gihapong lig-on sa swimming, athletics, gymnastics, chess ug secondary girls volleyball.

 Ang MLO ipahigayon unta niadtong Oktubre 25-27, apan gisubog kini tungod sa kusog nga linog miigo dinhi sa  Cebu ug Bohol.

 Kadaghanan sa mga duwa ipahigayon sa CCSC, samtang ang basketball duwaon sa Cebu Coliseum, ang badminton, sipa ug sepak takraw adto sa Metro Sports sa Brgy. Lahug. Ang elementary volleyball duwaon sa University of Southern Philippines  Foundation (USPF), ang secondary volleyball sa Aznar Coliseum, ang tennis sa Alta Vista Golf and Country Club ug ang taekwondo sa Cebu Eastern College. (BANAT NEWS)