Latinos nangabot na
CEBU, Philippines - Ania na sa Pilipinas ang lima ka mga Latino nga boksidor aron moladlad sa ilang abilidad sa "Pinoy Pride XXIII" karong Nobiyembre 30 didto sa Smart Araneta Coliseum.
Unang miabot niadtong Sabado ang kanhi Mexican world champions nga sila si Sammy Gutierrez ug Jose Alfredo Rodriguez uban ang ilang mga trainers.
Si Gutierrez mosukod sa abilidad ni WBO light flyweight champion ALA Boxing Gym superstar Donnie Nietes, samtang si Rodriguez makigbatok ni kanhi Pinoy world title challenger Milan Melindo.
Ang undefeated Nicaraguan nga si Carlos Buitrago miabot na usab sa Manila uban ang iyang trainer. Suwayan niya paglangkat ang WBO minimumweight title nga gihuptan karon ni Merlito Sabillo.
Miabot sab niadtong Domingo ang Puerto Rican nga si Lucian Gonzales ug Vladimir Baez sa Dominican Republic.
Si Gonzales makigsinukliay og kumo ni kanhi two-time world title challenger AJ Banal, samtang ang knockout artist nga si Baez makigsangka ni light welterweight prospect Jason Pagara. (BANAT PALARO)
- Latest
