Simat, Ramirez naghari sa 2nd Royal Run

CEBU, Philippines -  Misidlak  ang  bitoon  nilang  Kenyan Isaac Simat ug Meirez Ramirez sa gipahigayong  Elizabeth  Hotel's  2nd Royal Run kagahapon sa buntag didto sa Terraces sa Ayala Center-Cebu.

 Gidominar ni Simat ang men's 21K half-marathon human niya gitapos ang dagan sa oras nga 1:14:07, samtang ang iyang mga kababayan nga silang   Douglas Mwiti (1:17:20) ug James Mibei (1:18:06) maoy miangkon sa sunod nga duha ka dapit.

 Sa  iyang  bahin, si Ramirez mao sab ang hara  sa women’s open sa oras nga 1:40:59. Gipilde niya si  Mary Jane Beboso (1:50:29) ug Odessa Abella (1:54:25)  nga mipahiluna sa ikaduha ug ikatulo nga dapit.

 Ang managsuong Lovely Fe ug Jean Andrin maoy miangkon sa unang-duha ka luna sa women's 10K run. Gitapos ni Lovely Fe ang dagan sa oras nga 54:39, samtang si Jean mioras og 54:49.

 Sa iyang bahin, ang Kenyan nga si Abraham Missos mao sab ang kampiyon sa men's 10K sa oras nga 32:14. Si Prince Lee, kinsa  mioras og 32:50 mipuwesto sa ikaduha, gisundan ni Robert Daang sa oras nga 38:37.

 Ang kinamanghurang Andrin nga si Cherry maoy nanghawod sa 5K run sa oras nga 18:39. Sila si  Riza Bausin (19:19) ug kanhi Cebu road running queen Christy Sevilleno-Tutor (19:54) mi-okupar sa ikaduha ug ikatulo nga dapit.

 Si Darrel Manuz mao sab ang nidominar sa 5K men’s class sa oras nga 17:38, gisundan nila ni Joel Delposo (17:38) ug Monching Bongkiat (21:14). (BANAT NEWS)