P80 mil gitaganang cash prize
CEBU, Philippines - Moabot ngadto sa P80,000 ang gitaganang ganting salapi alang sa top performers sa 1st Mayor Democrito 'Aljun' Diamante Inter-Town and Inter-City Chess Team Tournament nga ipahigayon karong Disyembre 21-22 didto sa ilang plaza.
Sumala pa ni tournament arbiter Marvin Y. Ruelan, nga ang matag koponan langkuban og upat ka regular players ug usa ka reserve.
Ang duha ka adlaw nga kompetisyon bukas sa tanang kalungsoran ug mga dakbayan sa probinsiya sa Sugbu gawas lang sa siyudad sa Sugbu. Matag lungsod tugotan nga mokuha og usa lang ka import nga dili botante sa lungsod nga iyang dad-on.
Ang kompetisyon ipaagi sa 5-round Swiss system depende sa gidaghanon sa mga partisipante.
Gawas sa mga tropeyo, ang kampiyon mobulsa og P30,000, ang ikaduha makadawat og P20,000, samtang ang ikatulo makaangkon og P10,000. Ang fourth ug fifth placers makadawat og P6,000 ug P4,000 matag usa.
Ang top individual performers makadawat og dugang P1,000 matag usa alang sa boards 1 ug 2 ug P750 sa boards 3 ug 4.
Ang registration og nagkantidad og P1,500.
Alang sa dugang mga kasayoran sa maong kompetisyon, mahimong mokontak ni FIDE arbiter Marvin Ruelan sa 0926-7352951. (BANAT PALARO)
- Latest
