UV-SWU rematch

CEBU, Philippines - Magkuros na sab ang dalan sa duha ka  mortal nga karibal -- ang reigning Cebu Schools Athletic Foundation Inc. (CESAFI) champions University of the Visayas (UV) Green Lancers ug ang runner-up Southwestern University (SWU) Cobras alang sa 2013 National Collegiate Championship  Southern Islands title karong adlawa diha  sa Cebu Coliseum.

Magkuros na sab ang dalan sa duha ka  mortal nga karibal -- ang reigning Cebu Schools Athletic Foundation Inc. (CESAFI) champions University of the Visayas (UV) Green Lancers ug ang runner-up Southwestern University (SWU) Cobras alang sa 2013 National Collegiate Championship  Southern Islands title karong adlawa diha  sa Cebu Coliseum.

 Kini human nila gidispatsar ang tagsa-tagsa  nilang kaatbang kagabii.

 Ang UV Green Lancers yano kaayong mitagak sa Holy Trinity College (HTC) Wildcats sa General Santos City pinaagi sa paglubong sa iskor nga 100-80, samtang ang SWU Cobras  munasginhawa pagpalagpot sa gahing University of San Carlos (USC) Warriors, 82-73.

 Ang UV Green Lancers ni coach Felix 'Donbel' Belano Jr. mopakita pag-usab sa ilang kadominante batok sa SWU Cobras, kinsa gipilde nila sa  ilang "best-of-five" final series aron sakmiton ang 13th CESAFI title.

 Usa  kadto ka talagsaon ug halandumon nga  kadaugan sa UV Green Lancers tungod kay nakahimo gihapon sila pagbangon  gikan sa  0-2 sa best-of-five series.

 Parehong nangambisyon ang UV Green Lancers ug SWU  Cobras nga moabante sa Final Four sa NCC (kanhi  Philippine Collegiate Champions League kon PCCL) nga ipahigayon sa ikaduhang semana sa bulan sa Disyembre.

 Sa pagbukas sa NCC niadtong Lunes,  ang CESAFI 3rd placer  USC Warriors  midaog batok sa Visayas leg champion Iloilo Doctor's College, 82-73.

 Ang regalo sa USC Warriors mao ang katungod sa pakigsangka batok sa SWU Cobras, kinsa mipilde kanila sa makaduha ka higayon  sa CESAFI.

 Sa duwa karong adlawa, itugyan ni coach Belano ang iyang pagsalig ngadto sa iyang langyaw'ng magduduwa nga si  Steve Cedrick Akomo, kinsa maoy mogiya sa  ilang local stars sa tandem nilang John Abad ug Wowie Escocio. Moabag sab silang Chris Perolino, Raffy Oktobre, Franz Arong, Alfred Codilla, Venhur Villamor, Vincent Mendoza, Arvie Cabañero, Miko Adam Marquez, Angelo Babia, Christian Fajardo ug ang masaarong rookie nga si Leonard Santillan.

 Sa pikas bahin, ang SWU magsalig sab sa ilang Cameroonian twin towers nga silang Landry Sanjo ug Fabrice Siewe, uban nilang Monbert Arong, Mark Jayven Tallo, Mohammed Adam, Bernie Bregondo ug Daryl Goloran.

 Saligan sab ni SWU Cobras coach Raul 'Yayoy' Alcoseba silang Mark Panerio, Jabby Bautista, Carlo Ortega ug Nelton John Otida. (BANAT NEWS)