Nagkahiusa tungod kang Yolanda

 Akong sugdan kining akong lindog pinaagi sa usa ka pag-ampo.

Prayer for Yolanda victims

 "Dear Lord God, please help the people of Tacloban, Ormoc, Samar and Cebu and from all other places who suffered a lot because of the super typhoon Yolanda. Give them hope and courage and the will to survive. Help them so that they will no longer be hungry for food nor thirsty for water. As they are now on the road to recovery, give them love and peace of mind. They may have lost their lives, their houses were leveled flat to the ground and their hearts were broken into pieces, but their faith is intact. Bless them oh, Lord and please hear our prayers. Amen."

 Yolanda, dili ka gyud namo hikalimtan tungod kay sa imong pagbisita dinhi sa Pilipinas, dili ang katahum sa imong ngalan ang imong gidala nga gasa kun dili ang kalaksot sa imong batasan. Ang matahom mong ngalan dili diay maoy himuong sukaranan sa imong pagka-babaye. Usa ka matang sa paglingla ang imong gihatod... hangin, uwan, balud ug baha. Karon amo kang pangutan-on, natagbaw ka na ba sa imong kabangis?

 Dili ka gyud namo hikalimtan. Kini dili kay amo kang gipangga, apan dili ka namo kalimtan tungod kay way sukod ang among kayugot ug kasilag kay kun imo pa lang untang nakita ang danyos sa kabangis nga imong gipahamtang ngari kanamo, motalikod ka gyud tingali ug mobakho. Ang dangoyngoy sa imong biktima nadungog sa tibuok kalibotan ug tungod kanimo nag-ilaid ang akong mga igsuon sa kalisud, kagutom, kauhaw, kahasol ug kabalaka.

 Mihapit ka man tuod didto sa Vietnam, apan imo kami gibinlan og makalilisang nga kasinatian nga dili gani kami gusto mga ibutang pa kini sa mga panid sa kasaysayan aron dili kami makahinumdom ug dili maglugmaw ang among luha sa kaguol.

 Butang nga hangtod karon wala pa namo hisabti. Ambot kun  unsay among sala nga nabuhat kanimo nga mao man kadtoy imong gisilot.  Apan luyo niini, naghatag kini'g birtud sa panaghiusa sa tanang Pilipinhon. Hinaut nga ang among madawat nga donasyon dili daw sama sa usa ka dugna sa asin sa kagamay ug unta ang mga ipanghatag nga hinabang gikan sa international communities, adto mahidangat sa nagkinahanglan. Dili ngadto sa mga tawo nga naglaraw nang daan kun unsaon pagdaog sa sunod pinilay.

 Halos tanang nasud sa kalibotan nagpakabana kay ikaw Yolanda igo lang mitalidhay. America, Russia, España ug Alemania, dia na sila. Ang among silingan sa Asya nga Indonesia, Japan ug Korea mitabang sab.  Mga sports association sama sa NBA, NBA-P, PBA ug NCAA mihatag na sad sa ilang donasyon. Mga NGO’s ug LGU’s mitabang sab.

 Sa akong pagpaniid, dili ako motuo nga walay politiko nga wala mohatag sa ilang donasyon. Imposible kana apan ang kadaghanan kanila wala lang tingali magpaila busa way katarungan nga atong birahan tanang mga political leaders. Ang angay banatan kadtong mga politiko nga gihimong oportunidad sa pagpalambo ug pagpahumot sa ilang kaugaligon ang kasamtangan nga kalamidad.

* * *

 POLIGRATES... taga-CAMOTES. Usa lang ako sa mapasigarbuhon kaayong taga-lungsod sa Poro, isla sa Camotes nga nahimuot ug misaludo sa kalampusan sa among paisano nga si Eliud Poligrates. Mihimo siya'g 13 puntos sa iyang debut game sa PBA  niadtong Domingo diha sa Cebu Coliseum. Usa lang si Eloy sa mga rookies nga nagdamgo nga sa ilang pagka-PBA player, molambo unta ang ilang panginabuhi gawas pa gyud nga mausab ang ilang personalidad.

 Si Eloy gikan sa barangay Mercedes sa Poro, isla sa Camotes  ug dili layo sa among lugar sa Poblacion, Poro. Wala na ako makasubay sa career ni Eloy didto sa Poro kay dugay naman akong wala makabisita didto.

 Dihang nagduwa si Eloy sa Congressional Cup didto sa Danao, nakabihalo ako nga taga-Poro diay siya. Wala madugay, ako na siyang nakit-an nga nagduwa sa Southwestern University tungod kay gikuha siya ni kanhi coach Dodie Miego. Nakaduwa siya sa CESAFI, apan dili maayo ang iyang pagbiya. Nakaduwa sab siya sa M. Lhuillier Kwarta Padala sa wala pa siya moduwa didto sa PBA D-League.

 Karon PBA player na si Eloy. Mabuhay ka Eloy.