P80T giandam alang sa Tuburan chessfest
CEBU, Philippines - Gibana-banang mokabat ngadto sa P80,000 nga ganting salapi ang giandam alang sa 1st Mayor Democrito 'Aljun' Diamante Inter-Town and Inter-City Chess Team Tournament nga gikatakda sa Disyembre 21-22 didto sa ilang plaza sa maong lungsod.
Si tournament arbiter Marvin Y. Ruelan misaysay nga ang matag koponan pagalangkuban og upat ka regular players ug usa ka reserve.
Ang duha ka adlaw nga kompetisyon bukas sa tanang kalungsoran ug mga dakbayan sa probinsiya sa Sugbu gawas sa siyudad sa Sugbu.
Matag lungsod tugotan nga mokuha og usa lang ka import, kinsa dili botante sa lungsod nga iyang representahan.
Ang kompetisyon ipasikad sa 5-round Swiss system depende sa gidaghanon sa mga partisipante.
Gawas sa mga tropeyo, ang kampiyon mobulsa og P30,000, ang ikaduha makadawat og P20,000, samtang ang ikatulo makaangkon og P10,000. Ang fourth ug fifth placers makadawat og P6,000 ug P4,000 matag usa.
Ang registration nagkantidad og P1,500.
Alang sa dugang mga kasayoran sa maong kompetisyon, mahimong mokontak ni FIDE arbiter Marvin Ruelan sa 0926-7352951. (BANAT PALARO)
- Latest
