Donaire Daog via TKO

CEBU, Philippines - Malampuson ang gihimong ‘comeback’ fight ni kanhi four-division world champion Nonito ‘The Filipino Flash’ Donaire Jr. human niya gipaundang sa ninth round ang Armenian nga si Vic ‘Raging Bull’ Darchinyan sa ilang sangka kagahapon didto sa Texas.

Unom ka tuig human sa una nilang sangka, gipakita ni Donaire nga dili taghap ang iyang gibuhat nga pag-knockout ngadto ni Darchinyan dihang iyang giusban og kulata ang Armenian boxer.

Usa ka nagpungasi nga left hook ang gipatugpa ni Donaire ngadto sa apapangig ni Darchinyan kinsa daling nahagsa apan mibarug ra usab. 

Human makita nga galipong-lipong pa ang iyang kontra daling gibombahan ni Donaire og bangis nga kombinasyon si Darchinyan kinsa wala na makahimo pa pagbaws rasun nga giuwang ni referee Laurence Cole ang away sa 2:06 sa ninth round.

Hinuon bisan pa sa impresibong TKO nga kadaugan, nakita gihapon nga naglisud si Donaire batok ni Darchinyan kinsa mao pay naglabaw sa score sa ubang judge.

Sa maong kadaugan si Donaire misaka ngadto sa 22-2, 21KOs record, samtang si Darchinyan nakahiagum sa iyang ikaunom nga pilde sud sa 46 ka away.

Kini ang pagbalik og daog ni Donaire human sa sakit niining unanimous decision nga kapildehan sa mga kamot ni Cuban champion Guillermo Rigondeaux niadtong Abril diin nahanaw sa iyang mga kamot ang WBO ug WBA super bantamweight titles. 

Human sa away, namahayag si Donaire nga gusto niya nga sangkaon pag-usab si Rigondeaux sa usa ka rematch sa sunod tuig.