Disiplina bugtong sekreto ni Fajardo

CEBU, Philippines -  Disiplina ug pagtuman sa mando sa coach maoy sekreto ni Petron Blaze Boosters ug kanhi University of Cebu (UC) Webmasters Junemar Fajardo sa iyang hayag nga  basketball career.  Mao kini ang usa sa gibutyag ni Fajardo atol sa iyang pagduaw dinhi sa Sugbu diin mihatag siya'g appreciation lunch sa  local sportswriters ug  mga kahigalaan didto sa panimalay ni UC team manager Atty. Baldomero C. Estenzo   sa Banilad, Mandaue city.

 Si Fajardo, kinsa magsaulog sa iyang ika-24 nga adlaw’ng natawhan karong Nobiyembre 17 atol sab sa pagbukas sa PBA Philippine Cup sa tulo ka dapit sa Pilipinas - Luzon, Visayas ug Mindanao, nagkanayon nga iyang gihimo ang tanan atol sa Game-5  batok sa San Mig Coffee tungod kay wala siya makaseguro kun kanus-a na sab siya makabalik sa finals.
 Iyang giisip nga ang umaabot nilang panagbagat ni Greg Slaughter dili usa ka panagribal kun dili usa ka paagi aron mas molampos ug mas mopakita sila sa tinud-anay nilang labok.
 Si Slaughter, nakahatag og duha ka CESAFI titles (2008- 2009) sa University of the Visayas (UV) Green Lancers  sa wala pa siya mobalhin sa Ateneo Blue Eagles  maoy  No. 1 draft sa PBA niadtong Domingo, Nobiyembre 3 diin gikuha siya sa Barangay Ginebra San Miguel. Iya usab nga gitabangan ang Blue Eagles pagdagit og  korona sa UAAP.
 Sa miaging tuig, si Fajardo sab maoy no. 1 rookie draft sa Petron Blaze.
 Sa maong tigum, si Fajardo  gihatagan og "tips" ni kanhi four-time MVP ug PBA legend Mon Fernandez ug UC coach Roel Gomez. 
 Tungod sa iyang pagka-loyal sa UC, si Fajardo nagtukod karon og usa ka scholarship foundation nga ginganla'g June Mar S. Fajardo Foundation.
 Unang palaran nga makatungha mao si Jessica Nuñez, kinsa mogradwar sa high school sa Pinamungajan diin naggikan si Fajardo. (BANAT NEWS)